Aizawl: BJP Lok Sabha MP official candidate Vanlalhmuaka chuan thlan tlin a nih chuan Union Minister nihna chanvo pek a nih ngei tur thu a sawi.
BJP Mizoram State President ni bawk Vanlalhmuaka hian Mizoram chhim lama Autonomous District Council area a fan meknaah hmun hrang hrangah thu sawiin, Lok Sabha MP atana thlan tlin a nih chuan State President tling awmchhun a nih avangin central minister nihna chance tha tak a neih bakah, Kristian pa a nih bawk avangin Union minister nihna chanvo hi an pe ngei dawn niin a sawi.
Vanlalhmuaka hian MNF Lok Sabha MP candidate K Vanlalvena chungchang sawiin, “MNF Candidate Pu Vena chuan NDA zawm a, a chhung atanga BJP beih a tum tih a sawi chu, Mizorama MP pakhatin a chhung atanga beih a tum hi mi a nileng lo chuan a mawl thlak zia an hrethiam ngei ang. MP 500 chuang neihna ram India rama MP pakhat neiin a chhung atanga beih a tum thu a sawi hi Central BJP hian an kuta tho fu ai pawhin an ngai pawimawhlo zawk ang,” a ti.
ZPM-in kalphung thar an tih chu kalpui a nih theih nan State-a ruling party MP candidate thlang lovin, central-a sorkar lai leh sorkar leh tur BJP MP candidate an vote a tul tih sawiin, “Kan thlang tling a nih chuan kalphung thar dik tak zawk chu kan hmu thei tawh ang. Delhi-ah pawh khuan ruling state chu AAP ni mah se, Lok Sabha seat 7 ah BJP thlan tlin vek an ni a, central sorkar atangin hmasawnna chak zawk an neih theih phah a ni,” a ti.
Congress Party chungchang sawiin Vanlalhmuaka hian, “Congress party chu khawvel ral hun atan an dah ta tih ang hi an ni tawh a. An sorkar laiin Mizoram-ah bomb an thlak a, kan hmeichhiate min pawngsual sak a. Kha aia kan ram, kan hnam chhiatna kha a awmlo a ni. Chuvangin, vawiinah mipui hmaa zak miah lova dawt hmanga campaign an la bei ngar ngar hi Mizoram mipui min ngaihnep zia tihlanna ah ka ngai a ni,” a ti bawk.