ZPM party MP (Lok Sabha) candidate Richard Vanlalhmangaiha chuan MP atana thlan tlin a nih chuan kuthnathawktute tan theihtawp a chhuah tur thu a sawi.
Thawhtanni khan ZPM Party chuan Ngopa Kawn vengah MP Election Street Campaign an nei a, he hunah thusawiin Richard Vanlalhmangaiha chuan Pathian leh mipuite zara MP atana thlan tlin a nih chuan ramin hmasawnna rotling a neih theihna turin theihtawp a chhuah dawn tih sawiin, “Mizoram sorkar leh sorkar laipui inkara indawrnaah leihlawnah ka tang dawn a. Mizoram chhung leh pawn lam tana tangkai thei ang berin hna thawk turin ka rawn pen chhuak a ni,” a ti.
Richard Vanlalhmangaiha chuan ZPM policy kuthnathawktute chawikan kawngah hma nasa taka lak a tum tih a sawi a. Kuthnathawktute chu tun lai khawl leh thiamna changkang tak hmangin lo neitute tana awlsam zawk leh thar hlawk zawk dangte pawh ngaihtuah a nih tur thu a sawi a. Chumi atan sorkar laipui hnuaia kuthnathawktute tana hamthatna awm te pawh tun aia nasa zawka haichhuah a tum thu a sawi.
Thusawitu dang, P&E Minister F Rodingliana, Lengteng bialtu MLA ni bawk chuan ZPM sorkar hian lui thlan bik a neihte hmangin power-a intodelh tumin hma a la mek tih sawiin, “Tuivai Hydel project hi kan hmalakna hmasa tura kan ruahman a ni a. A DPR ennawn turin kan sorkar veleh khan hma kan la nghal a. Heng kan hmalakna bawhzui tur hian ZPM in MP kan neih a ngai a ni,” a ti.