Pathianni zana inkhel ngaihven hlawh takah Manchester United leh an mikhual Liverpool te chu 2-2 in an inhnehtawk. United hian an hmelma lian ber Liverpool an chelh a, EPL hmahruaitu nih leh an tuma an tihthlawnsak. An mualah an chak zawh loh vangin United hian palina an hlat ve sawt thung.
- A tawp khar tha United
Old Trafford-a United leh Liverpool te inkhel hian ngaihven a hlawh viau a, United tan ngai lo Arsenal tantu ten United an tan viau phah. |an man awm lo takin United in an mualah bul an tan chhia a, chawlhlawk hmain goal khat an chhuah. Goal an chhuah a ni mai lova an mikhual te goal zawnah vawi khat lek pawh a pet lo va, an bet tlawk tlawk mai a ni. Liverpool tlarhmate chet that tawk loh vangin goal khat aia tam an chhuah lo hlauh a, an vannei hle. Bul tan chhe viau mah se chawlhlawk hnu lamah an khel tha ta viau thung a, an mikhualte an lehthal hman hial. Hun tawp dawn hnaiha penalty an chawi vangin United hian an mualah uiawm takin hnehna an chang zo lo.
Old Trafford a leng lut Liverpool in an khel tha a, United an nawr ber hmiah. Ball chang tam zawk leh hlauhawm zawk an nih ang ngeiin goal thun hmasa zawk an ni. Corner atanga ball kal, Darwin Nunez tauh pial leh chu vengtu nei lova awm Luis Diaz chuan hnaite atangin a pet goal a, minute 23-naah Liverpool hmahruaina goal a thun. Goal an thun hnuin an khel tha zui hle a, Reds hian goal thun theihna hun tha hmu thin bawk mah se di nghak Andre Onana an paltlang zo lova, an vanneih ni a ni lo tel bawk nen chawlhlawk hmain goal dang an thun belh thei lo.
Chawlhlawk hnu lamah pawh United an bet chhunzawm naa vanneihthlak takin goal an thun thuai thung. Liverpool defender Jarell Quansah ball pek fuh tawk lo chu United captain Bruno Fernandes-a’n a chang fuh. Ball an inpek sual bakah si nghak Caoimhin Kelleher awm hmun a lo fuh tawk lo bawk nen Fernandes hian hla tak atangin goal ruakah a pet goal a, minute 50-naah an si phurh a sut. He goal hian United a fuih phur viau a, game a inthlak thleng nghal hlawk. United in na takin an khingpuite an nawr a, an hlauhawm zui ta viau bawk. Liverpool nawr let hlauhawm viau thin mah se a pawimawh ber goal an thun thei lo.
Goal thun tuma an innawr tawn viau hnuin United an che fuh. Fuh taka an khingpuite an nawr tlang hnuin rawlthar Kobbie Mainoo chuan minute 67-naah mawi leh tha zetin a pet goal a, hma an hruai letna goal a thun. Hnufual zawk an nih vangin Reds an buai thar a, pressure sang tak hnuaia khel an nih bawk vangin an game a buai hman hial. Manager fing Jurgen Klopp-a’n player a thlak kual a, a tifuh. Bench atanga lut, game siam zui tak Harvey Elliott chu box chhungah Aaron Wan-Bissaka-a’n a titlu a, penalty a chawi. Inhnial theih tak penalty hi Mohamed Salah chuan chiang zetin a pet goal a, minute 84-naah an si phurh a sut.
2-2 a nih hnuin goal thun tumin an innawr zui nasa viau a, inkhel a hmuhnawm zui hle. Hun tawp dawn tepah Luis Diaz chuan goal a thun belh teuh hle a, hnaite atanga a pet na zet chu goal kham chungah a thlawkchhuak hlauh a, United an him hram. Goal dang luh belh lovin inkhel a tawp a, team inhal tak Manchester United leh Liverpool te chu 2-2 in an inhnehtawk zui ta a ni.
Old Trafford-ah an chak zawh loh vangin Liverpool in table chung bera kir leh an tumna an puitlin zo lova, an hmahruaina hloh felin, Arsenal hnuaiah an awm. Arsenal nen hian point 71 an hmu dun mek a, City in point 70 an hmu ve mek bawk a. EPL-ah champion tuma inum boruak a nung tha at at hle. Liverpool an chelh theih vangin hlim viau mah se United hian top 4 huang an hlat ve telh telh tho thung.
- Klopp-a’n thluak a vawrh
Old Trafford-ah an chak zawh loh vangin Liverpool manager Jurgen Klopp chuan mind game khelin, a thluak a vawrh zui hlak. Klopp hian pathianni zana an khingpui United game chu nep a tih thu a sawi uar hle a. An inhmachhawn tuma an khelh dan anga an khel nawn leh a nih a, an insiamtha lo a nih ngat chuan Arsenal chuan United hi an hneh dawn chiang lutuk niin Klopp hian a sawi zui nasa hle bawk. Liverpool chunga awm mek Arsenal hi May 11 khian Old Trafford-ah an la leng lut ve dawn. Klopp-a thusawi hian United a nawr tang ngei dawn a, Arsenal hneh ngei tumin thapui an thawh phah ngei a rinawm. Chu chu Klopp-a duh leh a tum ber pawh niin a ngaih theih a. Arsenal hneh tura United a fuih phurna tha tak a ni daih thei.
Arsenal hian London club lian pahnih; Tottenham leh Chelsea te bakah Manchester United an hmachhawn zui leh a ngai dawn a, Liverpool aiin an tan champion an tumna kawng a hautakin a khirh khan zawk.