Kar tawp khan tualchhung league khelh chhunzawm a ni a, football-ah hnuhma thar eng emawzat a awm belh. Kar tawpa football hnuhma langsar zual kan thlir kual leh ang.
- English Premier League
Pathianni zan khan khawvela club inhal berte zinga mi Manchester United leh Liverpool te chu Old Trafford-ah an inkhel a, 2-2 in an inhnehtawk. Liverpool tan Mohamed Salah chuan goal khat a thun a, an si phurh a sut. Salah hian Old Trafford-a United an hmachhawn hnuhnung paliah goal an thun zawn a. Salah hian United lakah vawi 11 zet EPL goal a thun tawh a, EPL-ah United laka goal thun hnem Alan Shearer record a khum. Salah hian inelna hrang hrangah United lakah hian goal 14 zet a thun tling tawh bawk.
Liverpool nen an inhnehtawk tum hian rawl thar kum 18 mi Kobbie Mainoo chuan goal khat a thun. Mainoo hian United player zingah Liverpool laka goal thun thei naupang ber record thar a siam a. Kum 2005-a Wayne Rooney siam a khum.
Liverpool lakah hian United captain Bruno Fernandes chuan yard 48.7 zeta hla atangin goal a thun a. 2014 hnu lama United tan hla tak atanga goal thun leh thei hmasa ber a. Yard 3 zeta hla atanga Rooney-a’n West Ham laka a goal thun chu United player zinga goal thun hla ber record a ni.
Chelsea a beisei phak lo Kai Havertz chu Arsenal tan a khel tha chhunzawm zel. Havertz hian EPL season kal mekah goal 9 lai a thun tawh a, hei hi 2021-22-ah Chelsea a zawm hnu lama EPL-ah a chetthat ber tum a ni hial a ni.
Arsenal player pawimawh Bukayo Saka chuan EPL season kal mekah goal 14 a thun tling tawh a, hei hi EPL-a a chet that ber tum a ni a. Kum 22 mi Saka hian EPL-ah goal 45 a thun tling tawh a, kum 23 la tling lo zingah EPL a goal thun hnem pariatna a ni mek.
- Copa del Rey
Inrinni zan khan Spanish Copa del Rey final khelh a ni a, kum 40 zet hnuah trophy lian an la ve leh ta nge nge. Athletic Bilbao hi Copa del Rey-ah vawi 24 an champion tawh a, he inelnaa champion ngun ber dawttu an ni.
- Italian Serie A
AC Milan tan Christian Pulisic a chetha chhunzawm zel. USA captain Pulisic hian an mualah Serie A match vawi thumah goal a thun zawn a. Hei hi club tan an mualah ngei khelh thum chhung goal a thun zawn hmasak ber a ni nghe nghe. Pulisic hi season kal mekah goal 11-ah a inrawlh tling tawh a. AC Milan tana a khelhpui Dusan Vlahovic, Olivier Giroud leh Rafael Leão te nen goal contribution-ah an intluk mek hlawm.
Club lian AC Milan hian an mualah chak zawn an harsat thin a, kum 2004-05 season ah an muala vawi 9 an chak zawn hnu khan season khatah vawi 7 chak zawn an la nei leh thei ta miah lo.
AS Roma manager thar Daniele De Rossi chuan a club thar a kaihruai hmasak 11 atangin point 26 zet a hmuhpui a. Roma hi vawi 8 a chakpui a, draw vawi hnih an neih bakah tlawm zawkah vawi khat an tang. Roma manager thar zingah game 11 atanga point hlawhchhuah tam lamah pahnihna a ni a. A chungah hian Rudi Garcia (31) leh Eusebio Di Francesco (27) te chiah an awm.
- German Bundesliga
Hmahruaitu Bayer Leverkusen an kaltluang zel a, tlawm nei lovin khelh 28 zet an kal tluang tawh. Leverkusen hi inelna hrang hrangah khel 44 chhung tlawm an nei lo zawn tawh a, Bayern Munich record an khum fel tawh. Xabi Alonso enkawl Leverkusen hian Bundesliga champion thar ni turin vawi khat chak chiah an mamawh tawh.
German tualchhung league hniam zawkah kum 177 zet hun hmang tawh FC Heidenheim chuan German club ropui Bayern Munich lakah inrinni zan khan hnehna an chang nawlh. FC Heidenheim hian an mualah ngei si hnih an phurh hmasak zet hnuin 3-2 in hnehna an chang let a. Tui let hnu lamah Bayern Munich a hneh vawi khatna a ni a, Bundesliga-a kai thar zingah Bayern Munich hneh thei hmasa ber an ni bawk.
Stuttgart forward Serhou Guirassy chuan Bundesliga season kal mekah goal 24 a thun tling ta a, Bundesliga-ah Stuttgart tan season khata goal thun tam ber Mario Gómez record nih rual in, record thar siam theihna hun tha tak a nei.
- French Ligue 1
Marquinhos chuan Paris St-Germain tan inelna hrang hrangah vawi 435 a khel tling ta a, PSG tana khel hnem ber Jean-Marc Pilorget record a nihrual a, record thar a siam ngei dawn niin a lang.
- Messi – Ronaldo
Hliam vanga a chawlh hnuin Lionel Messi chu Inter Miami tan a inlan ve leh thei ta a, Colorado Rapids nen 2-2 a an inhnehtawk tumin Messi hian goal a thun. Colorado laka goal thun nan Messi hian minute 12 chiah a mamawh.
Saudi Pro-League an awl rih vangin Cristiano Ronaldo a awl rih a, Al Nassr hian April 19-ah inkhel an hmachhawn ve leh ang