- Dr. C. Lalrampana
A KAMKÊUNA
Lok sabha vawi 18-na seat 543 awmna thlang turin Jan thawm a na leh tan ta hle. Mizorama MP(LS) seat khat chuh tur hian mi 6-in hming an pe a; Candidate parukte hian Mizoram Lok Sabha inthlanpui lo awm turah hian scrutiny an paltlang vek a ni. Mipui vote neitute tan duhthlanna hrang hrang a awm thei ta a. Mizoram, Lok Sabha inthlan, scrutiny process, candidate-te hi, Congress, Zoram People’s Movement, Bharatiya Janata Party, Mizo National Front, Mizoram People’s Conference leh, Independent Candidate-te an ni. Candidate. 6-te hi an tha hlawm bawka vote thlak vat vat a chakawm ta hle mai! Mizoram phei chu vote thlak hmasaber tur zingah kan tel lehñghal. “Aw! A va nuam dawn êm aw! A va hlimawm dawn ém; hlim tawp hlau lovin ka leng ang” tih mai a chakawm tawh. Ni 13 vel chauhin min dãl ta. Campaign boruak pawh a sosang tan viau e.
ENGE AN ÃU HLAt
Ruling party ZPM hian nikum 2023 kumtir lam atanga an campaign ãu hla ber chu-”Keini chuan tumah kan sawichhe ve lovang; tumah sawi chhe hman kan ni lo, insawichhiat hi Ramhlui zia a ni, keini chuan kan ti ve dawn lo” an ti a. He ze tha lo tak hi reh nghal duak lo mah se a ziaawm phah viau niin a lang. Tunah MP (LS) seat khat lek inchuhin political campaign an han tanleh ta a, political party tinte’n ramhlui zia-”insawichhiattawn” bul an rawn tanleh ta. Political campaign-naah hi chuan pianthar tak tak a har a niang, ramhlui zia an hmangleh tan ta chur chur mai! Midang sawichhe kher lovin an party manifesto theuh uar takin sawi theuh mai se a tha ni mai tur. Candidate-te mimal nun (private life) thleng thlengin an inphawrhsakleh tan ta mek niin a lang. A bik takin political party upa ber Dec. 28, 1885-a din tawh INC phei hi chuan hetiang political tactic hi chu a thiamin a hnehsawh hle niin a lang. Press Release (PR) siam lah an thiam a, an taima bawk. April 6, 2024-a an PR No. MPCC/Media/PR-2024/15 point thenkhat hi han thlir lawk teh ang:
- April 19-a MP kan thlan turah hian pawl lianpui pahnih kan inbei dawn a. India constitution-in hnam hrang hrang leh sakhaw hrang hrang min humhalhna hnuaiah zalen taka Pathian kan biak zel duhtu party-te INDIA BLOC hnuaiah kan intel khawm a, lehlamah BJP kaihhruai an intelkhawm mup mup bawk a, anni hian India ram hi Hindu lalna ramah siam an tum ve thung a.
- Hnam hrang hrang leh sakhaw hrang hrang ten tih dan thin kan neih nuai bo a nih theih nan Uniform Civil Code dan siam tumtute an ni. MNF party-te chuan chu Hindu Lal ram din tumtute tha tih chak tum awm fahranin NDA an zawm tlat a. BJP kaihhruai sorkar India rama a din leh theih nan an campaign mek a ni. BJP sorkar a pian nawn leh vaih chuan India rama Democracy hi nuai bo-in a awm ang a, kan zalenna chhuhsak kan ni ang tih hlauhawm tak dinhmunah kan awm mek a ni a ti.
- Tuntum inthlanah hian tun hma lama kan la hriat ngai loh Mizoram-ah rawn thleng a awm ta tlat, chu chu Party pakhat BAK an rawn piang thar hi a ni. Chung leng leh hnuai lengte indo lai khan lamtang nei ngam lo BAK khan a chan tha zawk zawk lamah a phe a phe a, BAK anga dinhmun chiang lo nih hi kan duh ngai lo. Pathian thu pawhin lum law law emaw vawt law law emawa awm turin min zirtir a ni.
Kolkota khawpuia mipui nuaih 40 chuang an pung khawm tia chhuang taka sawi thin khan ngaihtuah let rawh se, . . ..
AN PR AWMZIA HI?
MPCC hian MNF leh BJP chu ãr chuk tui lo khawpin a chhuah a, ZPM pawh dawizep tan bik nei ngam lo, Bãk (bat) ang maiin a chhuah bawk. Central BJP lam pawhin INDIA BLOC chu retheihna thlentu mi mangang pungkhawm tangrual tak tak si lo, Nehru family chawi vulna satliah maiah a chhuah a, Mizoram state BJP lahin ZPM sorkar lah chu Central sorkar dawr hlawh chham, mizo thuam present an hlan bak hmasawnna awm lo angin a puh mek bawk a. ZPM lahin INDIA BLOC chu tling zo chuang lo turah ngaiin MNF pawh mahni pute bei reng chunga NDA bansan ngam chuang lovin a puh ve bawk niin a lang. Independent Candidate 2-te erawh khin tham vakah an ngai lem lo a niang beih an tawk ve lem lo.
A TLÃNGKAWMNA
Political Party tinte hian mahni theuh insawimawiin ramhlui zia nen campaign beihpui an thlak mek a nih hmel. Uniform Civil Code tih awmzia hi eng sakhua bik mah thliar lovin khawtlang mi zawng zawngte ram pum huap civil code angin inang tlang veka enkawl an nihna tur dan a ni a, hei hian- Inneihna, inthenna, rochan, fapa neih leh thil neih thlak danglam ang chite a huam a ni. India hi secular state a ni a, State sorkar eng pawhin nonsecular on policy emaw nonsecular course of action emaw a zawm chuan constitutional mandate kalh zawngin thil a ti tihna a ni a, Article 356 hnuaiah action lak theih a ni” tih a ni. MPCC-in BJP a puhna sakhaw zalenna bo mai tura a sawi thin hi hman atanga propaganda awm tawh a ni. UCC erawh hi hman chhin phawt loh chuan hriat mai a harsa rih. A lo tha lo a nih pawhin tute pawhin kan tuar tlang ang a, a tha viau a nih pawhin kan chhawr tlang dawn a ni mai. Buana hmaa lo kherh vakin awmzia a nei loh hmel hle. Missionary field pastor pakhat chuan-”Vai rama Kristiante’n ringlotute lakluh kan tum dan ang hian Zoramah hian Hindu puithiamho hian beihpui thlak ve ta se kan vawhlum vek duh ang, chuvangin, vaiho hi rin aiin an fel ngawt mai” a ti. Uchuak taka chetla thinte’n harsatna an tawk thin tih lohah chuan tun thlengin phairam lam missionary field-ah pawh kan la intir liam zel thei chu a nih hi! Chuvangin, INDIA BLOC emaw NDA BLOC emaw pawh ni se, mitinin kan duh zawng party leh mimal Candidate tha kan tih zawng chu zalen takin kan vote thei a, vote thlak theuh turin I inbuatsaih sauh sauh ang u.