- Ruata
Bajaj chuan 2024 Pulsar N250 chu India market-ah Rs 1,50,829 (ex-showroom, Delhi)-in an tlangzarh.
A thar hi a hmaa chhuak aiin Rs 851 chauhin a to a. TVS Apache RTR 200 4V, Honda Hornet, leh Suzuki Gixxer 250 te nen a inel chhunzawm zel dawn a, a man hi cheng nuai 1.42 leh nuai 1.98 inkar a ni.
Bajaj Pulsar N250 thar hi color scheme thar pathum – Black, Red, leh White-a siam a ni a. A thil neih thar langsar ber pakhat chu 37mm inverted fork suspension thar a ni a, hei hian handling lamah a puih viau a beiseiawm a ni.
He bike tharah hian Pulsar NS200-a kan hmuh ang, digital instrument cluster thar a nei a, he LCD unit hian tachometer reading, mileage, speed, fuel level, odometer, leh trip meter reading leh thil dangte a tarlang a. Hei bakah hian 2024 Bajaj Pulsar N250 hian smartphone connectivity a nei thar a, call, SMS alert leh turn-by-turn navigation te a tilang thei bawk a ni.
He bike tharah hian switchgear thar leh button thar a awm bawk a. Model hmasa ang bawkin a tank-ah USB charging port a awm chhunzawm zel a. ABS mode pathum (Road, Rail, leh On/Off Road mode), traction control system, leh tyre lian zawk, 110-section front leh 140-section rear te a nei bawk a ni.
Bajaj Pulsar N250 seat san zawng hi 800mm niin, hei hi a hma aiin 5mm in a sang zawk a, a rihzawng pawh 2kg in tihsan a ni bawk. A wheelbase erawh chu 9mm-in a tawi zawk a. Tunah chuan 1342mm a ni tawh a ni. he bike thar hian ground clearance 165mm a nei a, fuel tank-ah petrol litre 14 leng bawk a ni.
2024 Bajaj Pulsar N250 thar hian 249.07cc, single-cylinder, air/oil-cooled engine, a hmaa mi ang chiah a hman chhunzawm zel a. 24.5PS power leh 21.5Nm torque a pe chhuak thei a. 5-speed gearbox nen thlunzawm niin, assist leh slipper clutch a hmang bawk a ni.