Indian National Congress (INC) MP (LS) candidate Lalbiakzama chuan sorkar laipuiah BJP an sorkar nawn leh a nih chuan India ram hi mipui rorelna, democracy a ni reng ang em tih hriat a nih tawh loh thu a sawi.
Nilainia Lok Sabha MP inthlan lo awm tura INC candidate Lalbiakzama chuan Khawlailung leh Serchhip-ah te vantlang inkhawm a neihah BJP sorkar hnuaiah India ram chu a chhe chak tawh hle tih a sawi a. Khawvel ram hrang hrang 180 chuang zinga chanchinbumite zalenna tehna, Press Freedom Index-ah India ram chu 161-na a ni mek tih sawiin, “Chanchinbu mite zahawmna leh an zalenna hi a tla hniam chak hle a. Hei hian India ram democracy chu a tla hniam chak hle a ni tih a lan tir a. Khawvela eirukna lian ber Electoral Scam-ah Central BJP sorkar chu a hmingchhe hle a ni,” a ti.
Lalbiakzama chuan BJP hi an sorkar nawn leh a nih chuan India hi democracy a ni reng a ngem tih hi hriat a ni tawh loh avangin mithiamte leh mi thil chik mite an rilru a hah hle tih a sawi a. Jammu & Kahmir State, Muslim chen tamna a nih avanga an inhumhimna an han nuai bo sak dan te, Manipur-a Kristian Biak In an suasam dan leh an hal chhiat dan enin BJP hian mipui rorelna hi an nuai bo ngei a rinawm tih a sawi.
ZPM leh MNF Candidate te hi a mihring tak pawhin an sual a rin loh thu sawiin INC MP candidate chuan, “Mi tha tak an ni ang tih pawh ka ring. Nimahsela, BJP thawhpuia, BJP lama ban phar tur an nih miau avangin Mizo mipuite’n kan vote thlakna tur chu uluk taka ngaihtuah a, eng party candidate nge vote ila, kan ram, kan hnam, kan sakhua a him theih ang, tih rilru kan put a tul a ni,” a ti.
MPCC President Lal Thanzara pawhin thusawiin, an khingpuite chu pa tha tak an nih ve ve rualin, BJP talhfiak, RSS, Bajrang Dal leh VHP te nena thawkho an nih thu a sawi bawk.