Aizawl : Thawhlehni khan Lalthansanga (Chatea), Minister chuan MP Election Campaign-in Hachhek biala Tuidam, Kawrtethawveng, Zawlnuam leh Kanhmun te a tlawh a. Kawrtethawvengah hian mi 12 leh Kanhmunah mi 54 ZPM-ah lawmlut a, Hachhek bial mipuite chu ZPM MP Candidate lo vote theuh turin a sawm a ni.
Chatea chuan, “Kumin MP inthlan hi ZPM chuan kan la thutak hle a, Zoram pumah theihtawp kan chhuah a ni. Kan Candidate Richard Vanlalhmangaiha hi Nomination Committee-in uluk taka ngaihtuahna senga kan thlanchhuah a ni a, Zoram hmasawnna pawchhuak turin kan ring tawk a, ZPM sorkar a chak lehzual theih nan hnehna sang tak a chan theih nan min lo vote pui theuh turin ka sawm che u a ni,” a ti.
Chatea chuan, “Hachhek Bial hi Kum 1991-1993 khan Executive Organiser niin ka lo enkawl tawh a, kum 1993 MLA Election-ah khan Kawrthah bialah Candidate ka ni a. He bial atang hian thil tam tak ka zir a, ka tana politics rahbi pawimawh hmasa a nih avangin kan Senior te leh bial chungah lawmthu ka sawi a ni. Khatih hunlai khan kum lamah pawh naupang te leh tawngkam thiam lo mi ka ni a, mi rilru hliam palhte pawh kan lo nei thei a, chutiang zawng zawngah chuan ngaihdam ka dil a ni,” a ti.