Aizawl: Vairengte leh Sairang inkar kawngpui laih zauna tura a laih chhiat tur ram neitute chuan kawng laih hna tan thuai a nih theih nana hma la turin sorkar an phut a, April ni 15 hnuah pawh hmalakna a awm loh a nih chuan Lok Sabha MP inthlan boycott an tum.
Vairengte to Sairang four lane land owner association te chuan nimin khan Aizawl Press Club-ah thuthar thehdarhtute an kawm a, Vairengte leh Sairang inkar kawng four lane-a laih turah hian package thenkhat chu notification te pawh tih chhuah a ni tawh chungin forest department-in kawng laih tur chu road reserve forest leh Reverine forest in a huam chhung nia chhalin kawng laih tur hi an ti khaihlak a, forest department dodalna erawh High Court-in a hnawl sak thung tihte, hemi hnu hi NGO pakhatin high court ah zualko nawn leh mah se an in hnuh dawh leh tak avangin High court-in thuthlukna a lo siam tawh chu rin leh tur a nih thu an sawi a, hetianga court berin mimal ramah pawm a, thuthlukna a siam tawh hnu pawha tun thlenga harsatna la awm chu an hrethiam lo tih an sawi.
Ram neitute chuan, sorkar hmasa leh tuna sorkarna fawng chelh mektute hian high court thu anga kal chu an duh a, thuthlukna pawh an siam tih an sawi a, hetihlaia kawng laih phalna an la pe duh si lo chu tha lo an ti a, hetiangte avang hian dan angin an ram te chu sorkarin lak sak tawh mah se kum 3 hnuah pawh zangnadawmna sum an la dawng lo tih an sawi a, an harsatna chu sut kian a nih theih nana hma la thuai turin sorkar an ngen a, April ni 15 thleng an ngaichang anga, chumi hnuah pawh an phut angte a hlawhtling lo a nih chuan Lok Sabha MP inthlanpui chu ram neitute leh an vua leh vang zawng zawngin an boycott dawn tih an sawi a; association member hi chhungkaw 1700 an ni a, an vua leh vangte nen chuan an thahnem tham hle tih an sawi bawk a ni.