May ni 18 khian Saudi Arabia khawpui Riyadh in boxing chanchina inhnek lian ber pawl a thleng dawn a. Tyson Fury leh Oleksandr Usyk ten palian huanga tha ber nih an inchuh dawn. WBC champion Tyson Fury chuan a khingpui tur Usyk chu palian tak hneh turin a te lutuk tiin a sawi.
Boxing-ah palian huanga boxer tha bera ngaih ni mek chu WBC champion Tyson Fury a ni. Hetihlai hian Ukranian boxer rorum Oleksandr Usyk chuan palian huanga kawnghren pathum; WBA, WBO leh IBF kawnghren a kawl kawp mek thung. Fury leh Usyk te hian palian huanga kawnghren awm zawng zawng an inchuh dawn a, an inhneka chak zawk zawk hi palian huanga kawnghren pali kawl kawp thei hmasa ber an ni dawn. Fury leh Usyk te hi February thlaa inhnek tura ruahman a ni a, Fury a inhliam vangin May thlaah sawn hlat a ni.
Palian huangah inhnek vawi 35 hmachhawn tawh a, tlawm nei lova kal tluang mek Tyson Fury chuan a khingpui tur Usyk chu awlsam taka hneh thei turah a inngai a. An inlen hlei em vangin Usyk tan hian hneh ngaihna awm lo ang hialin a sawi. “Palian huanga pumraw vangtlang takte chu i hneh thei mial a nih pawhin keini ang palian bik hi chu i tan hneh ngaihna a awm lo. Kan len zawng hi a pawimawh tak zet a, weight then hran chhan pawh a ni reng a ni.”, tiin a pumrua a len zawk vangin a khingpui tan a harsa hle dawn tih a sawi.
Fury trainer ten Usyk an hneh ngei an ring hle a, knockout ngata chak turah an in ngai a. Fury co-promoter Frank Warren chuan Fury leh Usyk te inhnek tur chu kum zabi 21-naa inhnek lian ber tur ang hialin a sawi ve bawk.