#Zozam Times April 12: Lok Sabha inthlan lo awm tura MNF Candidate K. Vanlalvena’n vawiin khan Hnahthial, Thiltlang, Pangzawl leh Chhiahtlang te tlawhin, MP atana thlan tlin a nih chuan Mizo thalaite eizawnna dapsak, buh leh bala intodelh tura kut hnathawktute dinhmun chawisan, ranvulhtute tana hmalak, border trade chungchang te chu a hna pui ber tur a nih thu a sawi.
K. Vanlalvena chuan “Mizoram tana ka hmalakna hrang hrang te tihhlawhtlin theihna tur chuan central sorkar leh ZPM sorkar pawh tha takin ka thawhpui ang”, a ti a. Zoram thalai rual lehkha thiam leh thiamlote eizawnna a ngaihpawimawh zia sawiin, “Gujarat-a Diamond siamna hmunah ka kal a, ka be fo bawk a. Lehkha thiamlo pawhin Diamond nawt tle in hlawh tam tak an hlawh thin, hetah hian Mizo thalaite training pea, an luh theih nan hma ka la ang” a ti a. “India ram leh khawvel hmun hrang hrangah company leh hnathawhna hmun hrang hrangah an luh theih nan nasa takin ka bei ang” a ti bawk.
Sports lam kaihhnawihah thalaite tan eizawnna tlak hna a tam tawh tih pawh sawiin, K. Vanlalvena chuan “Mizo thalai tam takin eizawnna atan an hman theih nan hma ka la ang a, hei hi ka ngaipawimawh em em a ni” a ti a. “Korean zaithiam, K-pop te hi thalai ten an ngainatzia kan hre theuh a, Mizoramah ko lutin Korean tawng zirna instituion din turin hma ka la ang,” a ti.
K. Vanlalvena chuan Mizorama kut hnathawktute thawh chhuah tlem lutukin a rilru a tihnat thin thu sawiin, “Buh leh bal, thlai hrang hrang chingtute, sawhthing, oil palm, aieng, hmunphiah, hmarcha chingtute tan minimum price support ngaihtuahsak ngei ka tum” a ti a. “Parliament session-ah Mizoram, Arunachal leh Nagaland ah oil palm hralhna a chhe lutuk a, kg ah Rs 10 aia tlem lova hralh ka rawt chu a hlawhtling a, session leh hunah a aia sanga an hralh leh theihna turin rawtna ka thlen leh ang a, Kuhva chungchangah pawh harsatna kan tawk fova, thlan tlin ka nih chuan nasa takin hma ka la ang,” a ti bawk.
Model Village a thlan zinga pakhat Pang khua chu khaw pawimawh tak, nakin zel atan thenawm ramte nen inkalpawhna kawng a puitlin huna ramri khua pawimawh em em tur a nih avangin, Solar High Mast a phunsak tur thu K. Vanlalvena chuan a sawi a. “Ban eng zat nge phun tur chu ka sawi thei rih lova, hemi atan hian Rs. nuai 100 sanction a ni tawh a, inthlan puan avangin thawh theih a la ni lova, inthlan zawhah thawh a ni ang” a ti.
Sikul naupangte tan pawh Solar water filter dahsak a tum thu sawiin, “hengte hi MP fund ni lo, central sum CSR atanga ka nawr chhuah a ni” a ti a. “Assam lam nena buaina a awmin kan ei bar chawkluhna min hrek fo tihreh nan Kawrpuichhuah border trade te, Tuipui D lei dawh tur hmalakna kal mek leh muang lutuk te hi thlan tlin ka nih chuan chak zawka hmalak ngei ka tum a in” a ti bawk.