#Zozam Times April 12: MPCC Adviser Ronald Sapa Tlau-in Lok Sabha inthlan lo awm tura ZPM Candidate Richard Vanlalhmangaiha’n Central atanga sum vaibelchhe tam tak ama sawichhuah ang liau liauin a sawi nia sawiin, “a ti anglo hle in ka hria” a ti.

Congress party political session, Congress Bhavan, Aizawla vawiina neihah he thu hi MP (Rajya Sabha) hlui Ronald Sapa Tlau chuan a sawi a. ZPM Candidate thusawi nia a sawi chungchangah hian thuthar thehdarhtute kawm hial tura rawntu pawh an awm nual niin a sawi.

Ronald Sapa chuan “kum 2018-ah Pu Richie-a leh Pu Tlana te New Delhi-a ka chenna in-ah an rawn kal a, sorkarin MLTP Act. a siam hnuah Wine hralh a tlak loh thu leh Grape chingtu ten minimum support price an beisei thu an rawn sawi a, a tukah Agriculture Secretary ka hmuhpui” a ti a. He thil hi cheng vaibelchhe tel a nih vangin a inchiah rei thu leh a khat tawkin a ngaihven reng thu sawiin, kum 2019-ah Hnahlan khua a awm laiin Agticulture Secretary-in Grape chingtute sum Rs. vaibelchhe 3.5 a lakchhuah theih tawh thu a rawn hrilh a sawi.

Agticulture Secretary hnenah chuan he thilah hian mantang ei tur an awm leh awm loh a lo zawt niin Ronald Sapa chuan sawiin, “cut then a awm a nih chuan ka pocket atangin ka hnawhkhat ang’ a ti a, loud speaker-a dah ka nih avangin a sawi zawh rualin ka bul ami ten kut an beng dur dur a ni” Ronald Sapa chuan a ti.

Rajya Sabha MP hlui chuan “Tunhnuah hian vaibelchhe 3.75 a lang a, society-te sawi danin Pu Richie-a leh Pu Tlana hnenah 2.42 a lut tih thu te, 35% a inpe tih thu te ka hria a. Anni hi vawikhat ka hruai a, vawi tam tak ka bawhzui a, Pu Hawla DO lehkha kha a pawimawh ber chu a ni, kei chuan ka sawichhuah tiin ka sawi ngai lem lo.” a ti bawk.