Ningani zan khan Europa League quarter-final first leg khelh a ni a, champion tura rinkai Liverpool chu an mikhual Atalanta lakah si thum fai ngawta tlawmin an mualpho. Inkhel dangah EPL club West Ham United chu Bayer Leverkusen hneh lovin an tlawm ve bawk.
Champion tura rinkai, EPL club lian Liverpool hian an khelmual hman thiam, mikhual team talbuaina thin Anfield-ah Italian club Atalanta an mikhual. Serie A club lakah harsa lo taka chak thei tura ngaih ni bawk mah se chhe takin an inlan a, Anfield-ah ngei si thum fai ngawtin an tlawm. Anfield-ah ngei si thum faia Liverpool an tlawm hian khawvel a barakhaih. An mualah an tlawm chian em vangin Liverpool manager Jurgen Klopp tan ningani zana an match kha Anfield-a european competition a hmachhawn hnuhnung ber ni thei dinhmunah a ding.
EPL-ah an hmahruaina hloh hlimhlawl Liverpool hian an mualah ball chang tam mah se a pawimawh ber goal an thun thei lo. Darwin Nunez chuan goal thun theihna hun tha tum hnih a hlah a. United laka penalty hlawhchhuaktu Harvey Elliott chuan goal bar a tih per bawk. Tlarhma player langsar Mohamed Salah-a’n bul a tan loh vangin Reds tlarhma an hriam tawk lo. Liverpool in goal an thun theih mai loh vangin Atalanta an inringtawk telh telh a, chawlhlawk hmain goal an thun ta nge nge. West Ham player hlui Gianluca Scamacca chuan minute 38-naah Atalanta hmahruaina goal a thun a, Italian club hian 1-0 a hmahruai chungin chawlhlawk an hmang.
Chawlhlawk hnu lamah pawh Liverpool an insiamtha thei chuang lova, goal hnih ngawt an chhuah belh. Goal hmahruai thuntu Scamacca chuan minute 60-naah Atalanta goal hnihna thunin an hmahruaina a tizau. An mualah ngei goal hnih an chhuah vangin Liverpool in goal thun tumin tan an khawh thar. Ball chang tamin, an mikhualte nawr viau thin mah se a hmawr an bawk fuh thei lo. Uiawm deuhin an hun tha an hloh fo.
Liverpool in goal an thun theih loh laiin Atalanta vanneih a kal tluang a, hun tawp dawn hnaihah goal an thun belh leh. Si hnih faia hmahruai tawh Atalanta tan hian Mario Pasalic chuan minute 83-naah an goal thumna a thun a, an chakna a nem nghet. Pasalic goal thun hnu hian goal dang a luh belh thei tawh lova, Atalanta chuan team ropui Liverpool chu Anfield-ah ngei si thum faiin an hneh ta a ni. Atalanta lakah si thum fai ngawta an mualpho vangin Anfield-ah khelh 33 chhung zet tlawm nei lova Liverpool kal tluang lai chu a tawp fel ta bawk.
An mualah si thum fai ngawta an tlawm vangin Liverpool tan semi-final luh a harsa dawn ta hle. Atalanta mualah la inkhel nawn leh dawn bawk mah se semi-final luh beisei chhunzawm turin Liverpool hian 3-0 talin hnehna an chan a ngai dawn. Tlarhnung ven thiam Italian club lakah goal thum chin chunglam thun a, goal chhuah miah loh chu a harsa viau tura ngaih a ni thung. Atalanta hian an goal neihsa venhim ngei tumin thapui an tawh dawn a, tlarhnung veng nghal thei dinhmunah an din vangin Liverpool tlarhma tan pal tlang an har viau dawn a ni.
Liverpool manager Jurgen Klopp chuan season tawp rualin Anfield a chhuahsan dawn tih a lo sawi chiang tawh. Reds hian an manager ropui Klopp hi ropui takin thlah an tum a, trophy lia pathum nen tal Klopp hi thlah an tum hle. Trophy lian pathum an beiseina erawh a chuai ta viau thung. Champion tura rinkai ber zinga an telna Europa League-ah tla tluk an ni tawh. EPL-ah an hmahruaina hum zo lovin pahnihnaah an awm mek a. FA Cup atang phei chuan an hmelma lian ber Manchester United ngeiin an hnawtchhuak tawh nghe nghe. Liverpool hi Carabao Cup-ah an champion tawh a, Carabao Cup bakah champion belh ngei an tum a, trophy eng zat nge an lak belh theih ang tih erawh a chiang ta lo hle thung.
- West Ham pawh an tlawm
EPL club lian Liverpool an tlawm rual hian London club lian West Ham United pawh an tlawm ve bawk a, Europa league-a EPL club te dinhmun a derthawng.
West Ham hi German champion ni mai tur Bayer Leverkusen hmachhawn turin Germany-ah an zin a, BayArena-ah si hnih faiin an tlawm. Season kal meka chetha tluang tak Bayer Leverkusen hian an mualah goal thun thei lo rei viau mah se hun tawp dawnah an che fuh hlauh a, goal hnih an thun. Jonas Hofmann chuan minute 83-naah hmahruaina goal a thun a. Hun pek belh minute 90+1-ah Victor Boniface chuan an goal hnihna thunin an chakna a nem nghet. Mimualah tlawm mah se Hammers hian London Stadium-ah hnehna chan let ngei an tum ang.
- Result dang
Ningani zana inkhel dangah AC Milan chu an mualah an tlawm a, an mikhual AS Roma chu si khat faiin an hneh lo. An mualah AC Milan an tlawm lai hian Benfica chuan an mikhual Marseille chu 2-1 in an hneh ve thung.