Zirtawp zing khan NBA regular season khelh chhunzawm a ni a, Eastern Conference hmahruaitu Boston Celtic chu New York Knicks hneh lovin an tlawm a, khelh hnih an tlawm zawnna a ni. Inkhel dangah New Orleans Pelicans in Sacramento Kings an hneh a, playoff an hnaih phah lehzual.
Eastern conference-ah pathumnaa awm mek New York Knicks hian an conference-a hmahruaitu Boston Celtics lakah an khel tha viau a, quarter hnuhnung berah hnufual ve zeuh mah se an phu ang ngeiin hnehna an chang tho. Knicks hian quarter khatnaah point 32 an thawkchhuak a, point thumin an chungnung. Quarter hnihnaah point 37 zet an thawkchhuak zui leh a, point 18 zetin an chungnung a. Point 21 zeta hmahruai chungin chawlhlawk an hmang.
Chawlhlawk hnu lamah pawh point 21 zeta hmahruai fal tawh Knicks an khel tha chhunzawm a, quarter thumnaah point 8 in an chungnung zui leh. Quarter hnuhnung ber an hmachhawn dawn meuh chuan point 29 zetin an sang fal tawh a, chak tur a chiang deuh der tawh. Dinhmun chhe takah ding mah se Celtics an beidawng lova, quarter hnuhnung berah thapui tak meuh an thawh. Quarter hnuhnung berah hian point 20 zetin chungnung zawk mah se point 9 in an khingpuite hi an umphak zo lova, a zawna a vawi hnih nan an tlawm zui ta a ni.
Zirtawpni zinga inkhel dangah New Orleans Pelicans chuan an khingpui Sacramento Kings chu point 135-123 in an hneh a, playoff khelh phak an hnaih deuh deuh zel. Pelicans hian khelh hmabak pahnih la nei chungin Eastern Conference-ah parukna an luah mek a, play-off an khelh phak ngei a rinawm. Kings an hneh tum hian CJ McCollum leh Zion Williamson te chuan point 31 ve ve an thawkchhuak a, an chetha dun hle.
Play-in tal khelh phak tuma tan khawh Chicago Bulls chuan an khingpui Detroit Pistons chu point 127-105 laiin an hneh a, pakuana luah nghetin, play-in an khel phak dawn. Eastern Conference tabla mawngphaha awm Pistons an talbuai chhunzawm a, Bulls laka an tlawm hi khelh ruk an tlawm zawnna chiah a ni. Bulls tan hian DeMar DeRozan chuan point 39 a thawkchhuak a, assist vawi sarih a nei bawk.
2023-24 season a beisei phak lo Golden State Warriors in hnehna an chang ve leh ta a, Western Conference-ah pakuana ni chiang turin Warriors hian an khingpui Portland Trail Blazers chu point 100-92 in an hneh a, play-in an khel phak dawn. Warriors rual hian Utah Jazz pawh an chak ve nawlh. Vawi 13 zet tlawm zawn tawh Jazz hian point 124-121 in Houston Rockets an hneh thei hram a, hnehna an chang ve leh ta nge nge a ni.
NBA regular season-ah hian Eastern Conference leh Western Conference-a chetha paruk ten play-off an khel phak a. Pasrihna atanga 10-na theuh ten play-in an khel a, play-off khel tur an zawng ve leh thin