Ningani zan khan Europa Conference League quarter-final thawh khatna khelh a ni a, EPL club Aston Villa chuan Villa Park-a an mikhual Lille chu 2-1 in an hneh a, semi-final an hnaih. Villa rual hian Olympiakos pawhin an mualah hnehna an chang ve bawk.
Aston Villa hian Villa Park-a an mikhual French club lian Lille lakah bul an tan tha viau a, goal an thun thuai. Inkhel tan atanga minute 13-na lekah Ollie Watkins chuan hmahruaina goal a thun a. He goal hmang hian si khat faia hmahruai chungin chawlhlawk an hmang.
Chawlhlawk hnu lamah Villa an khel tha chhunzawm a, goal pawh an thun leh thuai. Minute 56-naah John McGinn chuan Villa goal hnihna a thun a, an hmahruaina a tizau. 2-0 a hma an hruai hnuin Villa an khel tha chhunzawm viau naa goal erawh an thun belh thei lo. Goal an thun belh theih loh laiin Lille in goal an thun ve phah. Lille tan hian Bafodé Diakité chuan minute 84-naah goal thunin an si phurh a sut then. He goal hmang hian beiseina thar nei mah se Lille hia goal dang an thun belh thei lova, Aston Villa lakah 2-1 in an tlawm zui ta a ni. Villa Park-ah tlawm mah se Lille hian Villa hi an mikhual let ve leh dawn a. Semi-final luh theih beiseina sang tak an la nei chhunzawm thung.
Ningani zana inkhel dangah Olympiacos chuan an mikhual Fenerbahce te chu 3 – 2 in an lo hneh a, semi-final an hnaih leh zual. Inkhel dangah Club Brugge chuan an mikhual PAOK Salonika chu si khat faiin an hneh a. Hetihlai hian Viktoria Plzen leh an mikhual Fiorentina te chu goal awm lovin an inhnehtawk ve thung.