Mizo Zirlai Pawl (MZP) in bang tura an ngennain awmzia a neih loh avangin MPSC Chairman chu chawlhkar thar (April 15, 2024), Thawhtanni khian a pisa kai tur dan an rel.
Zirtawpni khan MZP General Headquarters chuan executive emergency meeting neiin, MPSC Chairman bang tura an ngennain awmzia a neih loh avangin hmalak zel dan tur relin an thukhawm a. MPSC Chairman chu bang tura hun tiam an pek chhung, nimin tlai dar 5 thlenga a la ban loh avangin chawlhkar thar, Thawhtanni atangin MPSC Chairman pisa kai tur dan an rel a ni.
Thuchhuah an siam danin MZP chuan, March 27, 2024 khan MPSC hnuaia Combine Competitive Examination lak hnuhnung berah, answer paper leh mark tabulation-ah mark thenkhat thai chhiat leh correction fluid nasa taka hman a nih avangin thuchhuah a lo siam tawh a. April 3, 2024 a MZP Executive Meeting thukhawm chuan, heng buaina zawng zawng avangin MPSC Chairman JC Ramthanga IAS (Retd.) chu mawh laa bang turin a lo ngen tawh a. April 10, 2024-a MZP Press Conference chuan April 12, 2024 ral hmaa bang turin a ngen nawn a. Mahse. nimin tlai dar 5 thlenga a la ban loh avangin, MPSC Chairman pisa kai tur dan an rel ta a ni.
MZP chuan Combine Competitive Examination bakah, Food & Civil Supply Department hnuaia thawk tur, MPSC in Inspector of Supply a lak mekah, MPS a tling tawh pakhat chu Interview turin a ko tel chu mak an tih thu leh, Jr. Grade of Mizoram Forest Service (Asst. Conservator of Forest) post 3 lak turah, exam neih vek tawh a nih laia April 10, 2024 a MPSC thuchhuahin an qualification department-in a pawm loh chhuanlamin answer paper an endik dawn loh thu a tarlang leh si chu thalai hna zawng mek tam takte inbuatsaihna a thlawn chu pawi an tih thu, an thuchhuahah an tar lang bawk.