Russian khawpui, Orenburg-a tui lian chuan zual lam pan zelin hlauhawm chin aiin metre hnih zetin a chim sang tawh a, in thenkhat phei chu a chung chauh lang thei tawh a awm.
Mayor chuan mi chengte chu hmanhmawh taka an chenna hmun chhuahsan turin a ti a, siren tihrik a ni bawk.
Orenburg-a tui chim chin hi Zirtwpni kha a san lai ber tura ngaih a ni a; mahse, tui lian hi an thenawm region dangah a kai tan dawn nia ngaih a ni thung.
Kazakhstan pawhin tui lian hi a tuar nasa hle a, kar hmasa khan mi 1,00,000 zet hmun himah suan chhuah tawh an ni.
Tun kum 80 liam ta chhungin heng lai biala tui a len nasat ber tum nia sawi a ni.
Moscow atanga chhimchhak lam km 1,500 chuanga awm khawpuiah hian mihring maktaduai chanve vel an cheng a ni.
A chhak hret, Orenburg-a tui lian luh tanna, Orsk-ah chuan tui hi a kam tan tawh a. Orsk hi kar hmasa tawpa tuikhuah a luan liam avangin nasa takin tui lian hian a tibuai a. Russia rama thil thleng ngai lo tak thlen phahin sorkarin zangnadawmna pek a tum a tlem em avang leh thuneituten tuikhuah himna tura an chet dan a nep an tih avangin mipuiin lungawi lohna an lantir a ni.
Orenburg hi Ural luiin a luang tlang a, hmarchhak hawiin Kazakhstan-ah lutin Caspian Sea-ah a luang lut.
Ishim leh Tobol luite pawh hlauhawm chin chhinchhiahna chungah vek a luang a, April 23-24 vela a san lai ber thleng tura chhut lawk a ni.
Tui lian hian Kazakhstan hmar lam zawng a tuam a, tuikhuah zawng zawng a khat vek a, a luang liam nasa hle a ni.
North Kazakhstan region-ah chuan Ishim lui lian avang hian Petropavl-a tuikhuah pawh a luang liam tep a, Russian khawpui lian pahnih – Chelyabinsk leh Novosibirsk te inkalpawhna kawngpui chu chim vek thei dinhmunah a ding.
Hetih lai hian Russian khua, Kaminskoye chu Tobol luiin zan lamah metre 1.4 zet a lo chim avangin regional governor Vadim Shumkov chuan mi chengte chhuak vek turin a ti.
Region khawpui, Kurgan hi mi 3,00,000 vel chenna niin luiin a luan luhna a ni a, an dinhmun a buaithlak rih mek.
Shumkov-a chuan khawpui bula tuikhuah chu thuam that a nih thu a sawi.
Kurgan region leh an thenawm, Siberia khawthlang lama Tyumen-ah chuan emergency puan a ni.
Heng lai hmun, Eurasian landmass an tihah hian thlasik leh thal inher rem dawn lai hian tui a lian fo thin a; mahse, tun tum ang em em hi chu a awm ngai mang lo.