Zaithiam Rihanna chu magazine cover pakhata hmeichhe puithiam Nun sexy taka inlan vangin nasa taka sawisel a ni.
Kum 36 mi leh entreprenuer hlawhtling ni bawk hian sakhuana thila serh hran te inchei dan black & white dress nen inlanin, a âwm bawr tihlan hreh lo ni awm takin a inhawng viau, a tih theih.
Interview Magazine cover-a inlan dan hi Instagram leh X hmangtu thenkhat te chuan a pawina awm an hre lo mai ni lovin, a inchei dan an fak thung.
Mahse, mi tam zawk chuan sakhuana tihbawrban tumna leh rawngbawl tura serhhran te mualphothlak taka chhuah tuma puhin, social media lamah nasa takin an umzui ve bawk.
Tawngkam duhtui lo fe fe an inpawlhsawp nawk a, Rihanna fan te inkarah ngeiah pawh thu inchuh a nasa in, a inchei dan chungchangah hian Fashion thlan dan kawngah a mit a finzia leh mite rilru chawk tho thei bakah ngaihven nghal chat thei tura a remhriatna leh huaienna fak an awm laiin, sakhuanna hi thil ‘sensitive’ tak anih vanga tawngpawng basa ngam chi a ni loh thu leh mi tam tak rilru tihna theihna a nih vanga fimkhur taka kalpui an duh zawk thu auchhuahpui an awm.
Milar te hi naupang zawk leh tleirawlte icon an nih thin bakah mi tam takin ‘hero worship’ ang maia khunkhan taka an kalpui thin vangin nunchang mawi leh hmuhnuam zawka awm thin tur pressure te pawh a tam thin viau tak na a, beisei an pha lova sawi awm mek karah an mimal zalenna a ni, tia an thlavang hauhtu te pawh an tam.