Aizawl: MNF Adviser Robert Romawia Royte, MLA chuan Lok Sabha MP atan parliament chhung leh pawna huai taka ram leh hnam tana ding ngam thlanchhuah a pawimawh tih a sawi.
Lok Sabha MP inthlan lo awm tura MNF candidate K Vanlalvena campaign puia Hachhek bial khaw hrang hrang an fannaa thu sawiin Robert Romawia Royte hian, Mizoram aiawhtu tur Lok Sabha MP inthlan turah kohhran inzawmkhawm pawlte leh tlawmngai pawl te pawhin an duh danin, eirukna laka fihlim, Kristian-te thlavang hauh ngam, ram leh hnam tana parliament chhung leh pawna huai taka ding ngam thlan chhuah a pawimawh tih sawiin, “Kan ram, kan hnam, kan sakhua him nan mi tha, huaisen leh sawisel kai lo, corruption laka fihlim i thlang ang u,” a ti.
Hachhek bialtu MLA ni bawk Robert Romawia Royte chuan, tuna MP candidate mi paruk zingah mi tha tak tak an awm lai hian sawisel kai an awm nia social media-a thehdarh a ni chu vanduaithlak a tih thu a sawi a. Kohhranin political education nasa taka a zirtir tawh avangin mipuiin aiawh tur thlan kawnga fimkhur a tul tih a sawi bawk.