Aizawl: BJP Mizoram Spokesperson Lalremsangi Fanai chuan Prime Minister Narendra Modi sorkarin Mizorama sorkarna chelh tawh leh chelh mekte hi eng party pawh nise a en hrang ngai lova duhsakna tinrengin a vur thin tih a sawi.
Nimin khan Aizawl Press Club-ah thu thar thehdarhtute kawmin Lalremsangi Fanai hian PM Modi sorkarin Mizorama Congress leh MNF sorkar liam ta kha duhsakna tinreng luangliam khawpin a vur tih a sawi a. Tuna chief minister ni mek kaihhruai ZPM sorkar pawh hun rei lote an sorkar chhungin CSS Rs vbc 1.000 a pe hman tawh tih a sawi.
Lalremsangi Fanai chuan Modi sorkar hian India chu khawvela economy lian tehna kawnga pangana dinhmunah a hlang kai a, khawvela economy thang chak berah a ding mek niin a sawi a. India ropuina parchhuak mek hi Modi rorelna tha, policy leh programme, mipui leh mi retheite chhawmdawlna scheme hlawhtlinna leh mipuite hmasawnna a nih thu a sawi.
BJP Mizoram thupuangtu chuan inthlanpui lo awm turah BJP in sorkarna an chang a nih chuan golden card hmanga a thlawna Rs nuai 5 thleng inenkawlna chu Rs nuai 10-ah tihsan a nih tur thu a sawi bawk.
Mizoram Lok Sabha MP seat pakhat inchuhin MP Candidate paruk zingah Congress candidate, Lalbiakzama chauh lo chu BJP sorkarna lam thua thawhpui thei, a thian thaa neih tum vek tur nia a lan thu a sawi a. Hetihlaia Congress candidate Lalbiakzama’n politics chhunga hnam leh hnam, sakhua leh sakhua inhuat theihna hawia BJP do turin Congress a zawm thu leh Congress hotuten BJP chu Kristiante nuai chimih tumtu, secular paihbo tumtu, UCC kalpui tumtu, Article 370 lak kian chungchang nena sawi an zawm a, Mizo mipuite a sawi thaihna tawngkam an chhakchhuak fo chu Mizoram BJP in tha lo an tih thu a sawi.