Aizawl: Lok Sabha inthlanna neih tura campaign-a Chalfilh bial chhung khaw hrang hranga hun hmang mek MNF Vice President Lalchhandama Ralte, MLA chuan tun tum Lok Sabha inthlan lo awm tur hi hnam dang hmaah pawh zam loa ding tur Mizoramin a mamawh hun lai ber a nih thu a sawi.
Leader of Opposition ni bawk Lalchhandama Ralte hian, Lok Sabha inthlanpui lo awm turah hun danga MP inthan neih tawhte aiin a pawimawh bik hle tih sawiin, “Kan ram leh hnam, kan sakhua humhim tura mi huaisen, hnam dang hmaah pawh zamlo a ding tur Mizoram in a mamawh hunlai ber a ni,” tiin, Mizoramin MP inthlanpui a hmachhawn turah Mizo mipui, hnam thinlung pu zawng zawngte tanrualpuiah a sawm.
Lalchhandama Ralte hian, Mizoram in Lok Sabha MP inthlanpui a lo hmachhawn tawhah sorkar lai candidate ringawt hi thlan tlin an nih ngai loh thu sawiin, “Hei hian a hun lai ram boruak ang zelin mipuiin MP inthlanah sorkar lai candidate ringawt thlan an tum lohzia a tichiang a ni,” tia sawiin, Mizo mipui leh thalai zawng zawngte’n political party a tanzawng an lo neihte dahthain, tun tum MP inthlan neih turah hian K. Vanlalvena vote vek turin a sawm a ni.
ZPM party chu an MP candidate ruat chungchang ah an lungrual lo hle niin an sawi tih sawiin Lalchhandama Ralte chuan, “An party MP candidate hi thlak leh theih ni se, minute 1 pawh inngaihtuah lovin an thlak leh duh nghal ka ring. Tuna kan ram dinhmunah Mizoram hian hnam dang mizia hria aiin hnam dang ngam MP, Mizopa huaisen tak kan mamawh zawk a ni,” a ti.
Lalchhandama Ralte chuan, “Mizoram hi kan pi leh pute’n luchhum banchhum huam a an sahzau, hnamdang lak atanga an nunna hial hlan a an lo venhim ram a ni a, thangthar ten a humhalh leh venhim chu kan mawhphurhna a ni. Hu nrei tak chhung YMA chuan ‘Ram leh hnam humhalh’ tih chu kumpuan atan a lo hmang tawh a, kan ram hmalam kalzel tur thlirin tuna MP candidate te hi uluk taka kan thlir chhian a ngai a ni,” a ti bawk.