Pathianni zan khan English Premier Legue 2023-24 khelh chhunzawm a ni a. Hmahruaitu thar ni thei dinhmuna ding pahnih; Arsenal leh Liverpool te an mualah an tlawm ve ve a, table chung bera awm theihna hun tha an hloh. Arsenal leh Liverpool an chak loh vangin champion lai Manchester City in champion nawn leh theihna hun tha tak an nei. Pathianni zan kha EPL-ah mualneitute tlawm zan a ni a, math thum awmah mualneitu team an tlawm vek.
- Laipui a tlawlh
Inrinni zanah Manchester City an chak vangin table a danglam a, Arsenal chu pahnihnaah an tlahniam. Hmahruaitu ni nawn leh tura chak mamawh Arsenal hian Emirates Stadium-ah palinaa awm mek Aston Villa an mikhual. Chak mamawh tak chungin an mualah inlan mah se khel tha tak chungin goal an thun thei lo tluan a, a tlarhnungte chet fuh loh vangin hun tawp dawnah goal hnih ngawt an chhuah. An mualah ngei an tlawm vangin Arsenal in hmahruai theihna hun tha an hloh a, hun pawimawha an chetsual vangin an tan champion a harsa zui viau tura ngaih a ni.
Chak mamawh Mikel Arteta team te hian an mualah an khel tha viau a, ball an chan tam bakah hlauhawm an siam fo va. Ball chang tamin, an mikhualte nawr bet viau mah se goal an thun thei lo va, uiawm takin an hun tha an hloh leh thin. Gunners hi an elpui lian Manchester City leh liverpool result hre saa inlan an ni a, pressure tam takin a delh. Hun pawimawh taka chak loh khut ching an nihna kha a lo a bo lo va, hmahruaitu nih nawn leh theihna inkhelah an tlawm leh tut a, an ‘Teuh Senal’ leh mai ang tih a hlauhawm zui hle.
Palina luah nghet tura chak mamawh Villa hian Arsenal lakah an goal an venghim hram hram a, Emirates Stadium-ah an thawhrim rah an seng a, hun tawp dawn hnaihah goal hnih an thun ta hial. Inkhel pawimawh takah hun rei tak chhung goal lut a awm theih loh hnuin hun tawp dawn hnaih minute 84-naah Leon Bailey chuan Arsenal si nghak David Raya chetthat tawk loh a hrem a, awlsam takin hmahruaina goal a thun. An si phurh sut tumin Gunners hian tan khawh zui chiam mah se an chesual nawn leh a, goal an chhuah belh leh. Villa hian fuh zetin Arsenal an nawr tlang nawn leh a, club lia zawkte pawhin an hmuhtaih em em Ollie Watkins chuan minute 87-naah an an goal hnihna a thun a, an hmahruaina a tizau.
Goal thun mamawh viau mah se Arsenal tlarhma an hriam tawk lova, Villa tlarhnung inremphui tak an paltlang thei lo tluan. Hun tawp thlenga goal an thun theih loh vangin Arsenal hi an mualah ngei si hnih faiin an tlawm a, Manchester City lakah an hmahruaina an hloh fel. City aia an khingpui tur an hautak zawk bawk si vangin Arsenal hi a teuhin an thamral leh mai ang tih a hlauhawm ta ta.
Gunners hian London club lian pahnih: Chelsea leh Tottenham te bakah Manchester United an hmachhawn a la ngai dawn a, an hmabak a hautak hle. Champion turin chak vek pawh ni se City result-a an inngahtel a ngai tawh dawn.
- Liverpool an pul
Liverpool chetthat loh a kal tluang a, trophy lian pathum lak kawp an tumna in a hlatsan zel a, champion belh turin hna hautak tak an thawh zui a ngai dawn.
Hmahruaitu ni thei tura chak mamawh Liverpool hian Anfield-ah ngei Crystal Palace an mikhual a, an mualah harsa lo taka chak thei tura ngaih a ni. Palace lakah hian chet an that an harsat teh tlat thin a, result mak tak a thleng zui ta hial reng bawk. Anfield-a lenglut Palace tan hian Eberechi Eze chuan minute 14-na lekah hmahruaina goal a thun a. He goal hi Reds in hun pumin an sut thei lo teh tlat a, Arsenal leh City hnuaia awm turin an tlawm zui ta a ni.