- Ruata
Force Motors chuan reiloteah Gurkha 3-door thar leh 5-door Gurkha te tihchhuah an tum a, tunah hian teaser video pawh an rawn tidarh tawh a ni.
Gurkha ngainatute ngaihven hlawh turin company chuan teaser video thar an tichhuak a, an design element mawi leh hmuh chakawm tak an pholang a. A thar turah hian tuna chhuak mek, tunhnaia hralhchhuah zui tak loh Force Gurkha 3-door version chu a tharin, tunhnaia sorkarin boruak chhia a pekchhuah theih dan khuahkhirhna thar ber milin an rawn tichhuak dawn a. He off-road SUV 3-door version hi BS6 Phase II emission standards April thla atanga kalpui a nih avangin tunhnaiah tihtawp lawk a ni.
Gurkha 5-door hi chu a chhuak dawn tih hman atangin kan lo hre tawh a, he huangah pawh hian kan tarlang fo a. A hmaa Gurkha chhuak aia lian leh a chhung pawh zau nuam leh mihring chuan tam theih tur 5-door version hi leitute lamin an bawh viau pawh a beiseiawm a, hetihrual hian offroad adventure atan ngawr ngawra nei tan chuan a eng emaw zawk zawk pawh a tha viau dawn a ni.
He version pahnih Force Gurkha thar kan hmuh tur te hian Mercedes aṭanga lak chhuah 2.6L diesel engine inang chiah an hman a rinawm a. 5-speed manual gearbox a nei dawn bawk a. Power leh torque figure hi hriat chian a la nih loh laiin, a hmaa chhuak thin hian 91bhp power leh torque 250Nm a pe thei a, hei nen hian a inthlauh vak a rinawm loh a ni.
Teaser video hian Gurkha 5-door thar hian center console-a driver’s seat bulah shift-on-the-fly 4WD knob dah a ni dawn tih a tarlang a. Gurkha 3-door tihtawp tawhah hian independent front leh rear diff-lock lever dah a ni a, gear lever hnung lamah manually operated transfer case dah a ni bawk a ni.
Design lamah chuan Force Gurkha 5-door leh 3-door te hi a inang tlangpui dawn a dawn a, styling lamah danglamna tlemte a awm hmel a. Chung zingah chuan rear door, wheelbase sei zawk, leh front leh rear bumper chi thar deuh te a ni. Gurkha thar turah hian two-slat grille, square headlamp, leh 16-inch alloy wheel design thar, 245/70 R16 tyre nei te pawh a awm dawn a ni.
Official teaser hian Gurkha thar hi a cheina tur accessories hrang hrang, jerry can holder, roof rack leh rear ladder te nen an ti chhuak dawn tih a nemnghet bawk a ni. Engpawhnise, lei duh tur te chuan an la nghah phawt a ngai dawn a. Mizoramah pawh lifestyle offroad SUV te hi an uar ta viau mai a. Gurkha pawh hi pollution norms thar nen dealership mumal leh rintlak tak hnuaiah kan hmu chho dawn niin a lang a, Mizo lirthei ngainatute pawhin an lei chhoh sup sup a beiseiawm a ni.