Thawhtan zana EPL match awmchhunah season kal meka chetha lo Chelsea chu a mikhual Everton lakah an inhrithla a, Stamford Bridge-ah 6-0 ngawtin an chak. Everton an sawp tum hian Cole Palmer chuan goal li ngawt a thun a, EPL-ah Chelsea tan match khata goal li thun thei palina a ni.
Table laihawl chhuahsan hleithei lo Chelsea hian Stamford Bridge-ah bul an tan tha viau a, chawlhlawk hmain goal li ngawt an thun hman. Chawlhlawk hmaa goal li an thun bakah chawlhlawk hnu lamah goal hnih an thun belh leh a, phu takin hnehna an chang. Blues tan hian season kal meka chetha tak Cole Palmer chuan Jackson siamsak atangin minute 13-naah hmahruaina goal a thun. Hma taka goal an thun vangin Blues an phur a, inrintawkna sang zawk nen an mualah an inlan chhunzawm.
Hmahruaina goal an thun hnuin Chelsea hian goal an thun belh leh thuai. Jackson pet tha zet chu Everton si nghak Jordan Pickford-a’n a dang zet naa ball per let leh hi Cole Palmer chuan awlsam takin a pet goal a, minute 18-naah an goal hnihna a thun. Goal hnih a thun hnuin Palmer hian minute 29-naah an goal thumna a thun zui leh a, hattrick a siam. Stamford Bridge-a an khelh hnuhnung pahnihah Palmer hian hattrick a siam zawn a, a chetha vet vet hle. Palmer-a’n hatttrick a siam hnu hian khel tha tak Nicolas Jackson chuan minute 44-naah an goal lina a thun a, 4-0 a hmahruai chungin chawlhlawk an hmang.
Chawlhlawk hnu lamah Chelsea an khel tha chhunzawm a, table hnuai lama awm mek Everton lakah goal an thun leh thuai. Chelsea hian minute 69-naah penalty an hmu. Penalty pet an inchuh nak nak hnuin goal thum thun tawh Cole Palmer chuan a pet a, pet goal in an goal lina a thun. Palmer-a’n a mimal goal lina a thun hnu hian Alfie Gilchrist chuan minute 90-naah an goal rukna a thun a, an hmahruaina a tizau. Alfie Gilchrist goal thun hnuin goal dang a luh belh thei tawh lova, Chelsea chuan an mualah 6-0 ngawtin hnehna an chang zui ta a ni.
Everton laka goal li ngawt thuntu Cole Palmer khan nipui bazar inhawn lai khan Manchester City atangin Chelsea a zawm a, a club tharah a chetha vet vet hle. Blues tan hian EPL-ah goal 20 a thun tling der tawh a, City forward Erling Haaland nen an goal thun zat intlukin top scorer an ni dun mek. Palmer hi Diego Costa hnu lamah Chelsea tan season khata goal thun hnem ber a ni mek a. Chelsea tan EPL match khatah goal li thun thei palina a ni a, Frank Lampard, Jimmy Floyd Hasselbaink leh Gianluca Vialli te hnung a zui. Chelsea hian hattrick a siam zawn nghe nghe. Club tan a khelh that em vangin kum 21 mi Palmer hian Euro 2024-ah England ai a awh phak a beiseiawm hle.