Mipui rorelna ram inthlan lian ber chu tan a ni dawn ta a, khwvel mihring cheng pariata pakhat zel ang velin vote an thlak dawn.
April 19 atang hian Indian-te chuan kum nga lo awm leh tur chhunga an ram kaihruaitu tur an thlang tan dawn a, Prime Minister Narendra Modi chu a zawna a tum thum nan tlin leh tumin a bei mek.
Opinion poll hrang hrangah chuan Modi-a kaihhruai, BJP leh an tanrualpuite chu tling leh tura ngaih an ni a. Indian National Developmental Inclusive Alliance (India) nen an inkhing viau a, anni hi Congress telin eptu party hrang hrang 24 chuang tangho an ni a. Anni hian kum 2014-a BJP-in thuneihna a chan hma zawng kha chuan ro an lo rel tawh hlawm.
Ram rorelna in hniam zawk, Lok Sabha member tur hi boruak chi hrang hrangin a tuam karah thlan a ni dawn a. Eptute chuan an campaign theihna tur tam tak dan niin an insawi a, sorkar laipui hnuaia dan kengkawhtuten an hruaitute an dal nasa niin an sawi.
Congress chuan chhiah thuneituten chawlhkar ruk chhung zet an bank account an hrensak a, campaign-na tur sumah an buai phah niin an sawi a. Eptu hruaitu lawk dang, Delhi Chief Minister Arvind Kejriwal chu ei ruk thubuaiah man a ni a, amah chuan a pha nasa hle.
Eptute hian inthlan thuneitute hnenah inrawlh turin an ti a; mahse, anni hi hi a hrang hlaka ding an nih avangin an inrawlh duh lo.
Khawvela mihring cheng an tam berna, tliklehdingawn 1.4 zet awmnaah hian inthlan hi a lian hle a. Tun tumah hian chawlhkar ruk chhungin, thawh sarihin MP 543 an thlang dawn a, June 1 thleng vote thlak tur niin June 4-ah result puan a ni ang.
Mi maktaduai 969-in vote an thlak thei dawn a. US, Russia, Japan, Britain, Brazil leh France-a cheng zawng zawng belhkhawm ta ila, chu chuan India-a vote nei hi a la zat pha lo deuh va. Belgium-a cheng belh an la ngai a ni.
Vote thlaknaah hian venhimna leh a hmuna buaipui a hautak hle a. Election Commission chuan a vawi khat nan kum upa leh pianphunga rualbanlote chu an ina vote thlak a phalsak.
Polling booth maktaduai 1.5 zet a awm dawn niin Chief Election Commissioner Rajiv Kumar chuan sawiin, “Mipui rorelna hian India kil tin a thleng dawn,” a ti.
“Kan team-te hian mi tin thleng turin thui tak tak an kal a ngai a, thenkhat chu ramhnuaiah leh tlangram, vur hmun paltlang ngai pawh a awm a. Sakawr, sai, sa dang leh helicopter thlengin kan hmang dawn a. Kil tin kan thleng vek ang,” tiin Kumar chuan a sawi bawk.
Polling booth tam zawk hi sikul, college leh community centre a ni dawn a, thenkhat erawh shipping container, tlang chhip leh ramhnuaiah te a ni dawn thung.
Kum 2019 inthlanpuiah khan official panga chu mi pakhat lek vote nei awmna hmun panin bus leh ke-in ni hnih ngawt an kal a. Hmarchhaka Arunachal Pradesh-ah hmeichhia kum 39 miin vote a lo thlak a ni.