MPSC hnalak hrang hrangah dik lo tam tak a awm avangin MZP chuan MPSC Chairman chu mawhphurhna laa bang turin a phut a. MZP ngenna in awmzia a neih loh avangin nimin, Thawhlehni khan a ni hnihna atan MPSC Office kawtah zirlaite an pungkhawm chhunzawm.

MZP chuan zing dar 8 atangin MPSC Office kai tur an dang ṭan a, MPSC hnathawktute tumah office kal luih tum an awm lem lo a, boruak muanawm tak hnuaiah hun hman a ni. MZP chuan chawhnu dar 2 khan MPSC Office kai tur dan hi a titawp rih bawk.

MZP hruaitute chu hmalak chhunzawm zel dan tur ngaihtuahin a thukhawm a, Mizoram sawrkar Vigilance Department-in MPSC hnalak dana thil fello awmte chhuitu tur Inquiry Officer (I.O) atan M. Lalmanzuala IAS (Retd.) Mizoram Chief Secretary leh MPSC Chairman lo ni tawh a ruat hi lawmawm a ti hle a. Dikna duhmi, mi huaisen a nih avangin MZP chuan Inquiry Officer hi a ringtawk a, ngun takin a hmalak dan a ngaichang dawn a ni, tiin thuchhuah an siam.

Inquiry Officer-in zalen taka hna a thawh theih nan leh, chak zawka hna a thawh theih nan MZP chuan MPSC Office kawta punkhawm chu neih chhunzawm rih loh nise a ti a. Chhui chianna hna thawh a nih chhung chuan, MPSC Office chu khar a, tumah hna thawk lo turin MZP chuan thuneitute a ngen nghal bawk.

COE a kal lui nia hriain MZP te an pungkhawm leh

MPSC Staff thenkhatten office an kai lui nia hriat avangin, nizan dar 5:30 vel atang khan MPSC Office kawtah MZP hruaitute pungkhawm leh.

MPSC hna lakah thil dik lo a awm ngeia MZP-in a hriat avanga, MPSC Office kai tur ni hnih chhung dan a nih hnuah, Sawrkarin Inquiry Officer a ruat a. MZP chuan Inquiry Officer chu ring tawkin, tha taka hna a thawh theih nan MPSC Office kawta punkhawm chu a titawp rih a ni.

Chutianga MZP-te ngaihtha taka an awm laiin, MZP hruaitute haw hnu nimin chawhnu dar 3 velah MPSC Controller of Examination (COE) chuan a staff-te office kal tura koin, office a hawn tir a. MZP chuan COE hmalak dan hi a hrethiam lo hle a ni, tiin thuchhuah an siam.

Inquiry lak a nih chhung chu MPSC Office hawng lo turin MZP chuan Home Commissioner a ngen a. Chutih mek laiin, COE in a ruk a ralin MPSC office a hawn tir leh, staff te a tir hian ngaih a ti tha thei lo a. MZP chuan MPSC Controller of Examination Zosangzuali Pachuau hmalak dan chu hnu chhui mekna tihbuai tum niin a ngai a, a dem takzet a ni, an ti.

MZP-in MPSC hnalak hrang hrangah thilfel lo tam tak awmin a hria a, hma a lak mek laia hetiang thil thleng hian rinhlelh a ti zual sauh bawk, an ti bawk.

He thu buatsaih lai zan dar 9 bawr vel thleng khan MZP hruaitute hi MPSC office kawtah an la awm a ni.