- Dr. C. Lalrampana
A KAMKEUNA
Ram changkang USA leh China etc.-te kan ang ve ta. India ram heti khawpa mihring tamna, hnam hrang leh tawng hrang tamna; political party hrang hrang tamna ni mah ila tunah chuan ‘right wing conservative political alliance leh left wing political alliance-in hlawm lian pui pui pahnihin kan kal ve ta mek a, a tihzia phian. Hmalam hun zelah engang tak ang i maw?
NDA BLOC CHU ENGE NI?
Bharatiya Janata Party (BJP) kaihhruai Central-a sorkarna chelh mektu pawl ‘National Democratic Alliance (NDA)’ tihna a ni a; kum 1998 khan din a ni. Tun dinhmunah India ram State & UT Sorkar 18 a thunun mek a ni. Sorkar laipuia Ruling party intelkhawmte an ni a. Political party hrang hrang 41 intelkhawm an ni a, NDA Sorkar tia sawi an ni bawk thin. Lok sabha member 543 awmah MP 346 an nei a; Rajya Sabha member 245-ah MP 119 an nei. Rorelna in 2-ah hian member an ngah rem rem hle.
INDIA BLOC VE THUNG HI?
Hei hi chu Indian National Developmental Inclusive Alliance 18/07/2023-a din @‘United Progressive Alliance’ (UPA) tih thin kha a ni ve thung. Central sorkara eptu pawl hlãwm inzawmkhawm Indian National Congress (INC) kaihhruainaa party hrang hrang tangrual inhlãwmkhãwmte chu an ni. Anni hi kum 2004 khan din niin 2014 thleng khan Sorkar laipuiah rorelna an kengkawh a ni. Tunah hian India ram State 6-ah ro an rel ve mek bawk. Political party 19 tangrual an ni a, hmanni lawk khan Trinamul Congress (TMC) Mamata Benerji hoten an chhuahsan zui lehnghal. Anniho hian Lok Sabha member 543-ah MP 108 neiin Rajya Sabha member 245-ah MP 64 chiah an nei. NDA Bloc chu an pha lo rem rem hle.
ENGE AN AN?
Heng party hlãwm lian pahnih ‘right wing’ leh ‘left wing’-te hian Sorkar laipuiah rorelna an chang ve ve tawh a; an rorel dan kan hre chiang ve ve tawh bawk. Inpuhtawn dan political campaign ãu hla (Slogan) an nei ve ve a. NDA BLOC hian INDIA BLOC lam hi Nehru family kingship hmanga India ram kaihhruai tumah an puh bakah miretheite retheihlehzualna thlentuah an puh a. INDIA BLOC lam ve thung hian NDA chu ‘Hindutwa’ atchilha sakhaw zalenna (secularism) rap beta sakhaw dangte tiduhdahtuah an puh ve bawk. Hemi denchhen hian Mizoram bikah phei chuan BJP kaihhruai sorkar leh BJP nih hrim hrim chu India rama Kristian Sakhaw zalenna daltuah ngaiin namen lovin puh chhiat chitin rêngin an puh thin a; hei vang hian Mizo mipui thinlungah BJP party chu chhan mumal tak tak awm lem si lovin mipuiin an tih khai deuh thup thin niin a lang. Mahse, an puhna ang em em hi chu a dik ber lo a ni mahna NDA hian term hnih thuneihna an chang mek tawh a, kan la buai êm em lem lo chu a nih hmel hle.
TUIN NGE MIN HMANGAIH ZAWK?
April 1, 2023 khan Union Home minister Pu Amit Shah chuan lehlangin AR-ho Zokhawsanga sawn chhuahna tur; Laldenga Centre lungphum leh project panga dang lungphum a vaiin cheng vbc 2,500 senna tur a rawn hawng kha a ni a; kum 36 chhunga Mizoramin vanneihna a tawh ropui ber a la ni hial mai awm e. PM Modi phei hi chuan North Eastern State-te changkanna tur a vei em avangin vawi 53 zet North East a rawn tlawh kual tawh a, hetiang PM hi India Independence 1948 ata tun thlengin tumah an la awm ngai lo. UPA@INDIA bloc pian hma daih atangin INC hian kum 40 zet Sorkarna a chang tawh a; hetianga development project & scheme chhenfakawm tham min rawn thlensaktu an la awm lo niin a lang.
A TLÃNGKAWMNA
NDA Bloc & INDIA bloc awmzia leh an sukthlek dan kan hretawn ve ve ta. Tikhian tunge min hmangaihtu zawk chu sawi tam ngai lovin a lang chiang tawh hle? A bikin AR sawn chhuah phei hi chu 1997 chhova AR leh civil mite nen kan buai avanga Pu Denga’n AR-ho hela a puan atang khan sawn chhuah tuma beihna a awm tawh a. Kan state chhung bikah pawh NDA bloc & UPA@INDIA bloc-in ministry an inchelh chhawk tawh thin kha a ni a. NDA bloc lamin AR sawn chhuah an tum ngar ngar a; UPA@INDIA Bloc lamin an ngaihsak zui lem hlei lova. Chutiang reng renga kum 26 vel kan pal liam hnuah pawh a takin a hlawhtlinna hmuh tur a la awm thei lo. Khati tak khan Pu Denga khan AR sawn chhuahna tur khan Sorkar laipui lamah nawr lo ta se’ng chuan kumkhua pawhin AR-ho hi an che dawn lo niin a lang. Mahse, NDA bloc lamin beidawng duh lovin theihtawp chhuahin an bei thin naa a hlawhtlinna kan hmu rih lo. Khatih lai vel khan UPA@INDIA Bloc lam kha chuan -”khawpui laili atanga sipai insawn chhuak ka hre ngai lo” te kha an ti niin sawi a awm a. An lo ti tak tak a nih ngai chuan UPA@INDIA Bloc hian Zoram mipuite min lo hmangaih vak lo a ni ngei ang. Sakhaw lam thu ngaihtuahin NDA Bloc hi sawisel hlawh mah se INDIA Bloc hian tun inthlanah pawh hian an la lehthal hmel loh hle a, chuvangin, NDA Bloc lam bawk hian 18th Lok Sabha-ah hi chuan Sorkarna an la chang dawn tih a ring theih a; chuvangin, a tling apiang hi kan pawm thiam a ngai mai dawn niin a lang. Lok Sabha Elections 2024 opinion poll prediction: Bharatiya Janata Party kaihhruai NDA bloc hian Lok Sabha inthlanpui neih turah hian hnehna an chang dawn niin an sawi a, seat 543 zinga seat 399-ah mak tak maiin hnehna an chang dawn a, Prime Minister Narendra Modi-a’n ‘abki baar 400-paar’ campaign aiin seat khat chauh an la tlem zawk dawn niin an chhut. Hetih lai hian Congress hruaitu Manickam Tagore chuan Thawhlehni khan Lok Sabha inthlan lo awm turah rin dan a sawj a, General inthlan lo awm turah INDIA bloc chuan seat 300-ah hnehna an chang dawn tih a sawi ve bawk. Tu tak chak zawk ang maw? NDA bloc an ni emaw, INDIA Bloc an ni emaw, tu sorkar pawh lo ding se, ram tana an thiltih that leh chhuan tlak, chawimawi phùte chu chawimawi hreh lo ila, fak tlakte chu fak ngam ila; sawisel ngaia an awm chuan huaisen takin sawiselin siam tha ngam ila tun ai hian kan ramin hma a sawn ngei ang. Mizoram bikah chuan BJP & MNF-te hi NDA Bloc an ni a, MPCC leh AAP hi INDIA Bloc an ni. Ruling Party ZPM hi a neutral a, mahse, hnehna a chan hlauh chuan Central-a Sorkar apiang a thlawp dawn a, ram tana thalo turah erawh a dodal zel thung dawn niin an insawi. Engpawhnise, Jun 4-a inthlan result thlirin ring I lo fan theuh teh ang u.