Inthlanpuiah hian mipuiin chuhtu sang tel atangin an duh an thlak dawn a. National party paruk – BJP, Congress, Delhi-a rorel lai Aam Aadmi Party leh Communist Party of India (Marxist) bakah state-level recognised 58 zetin candidate an nei a. Heng bakah hian party tenau tete atangin candidate tam tak an awm bawk.
- Narendra Modi:
Prime Minister Modi-a chuan a tum thum nan tlin leh a tum a, opinion poll lak tawh chinah pawh a tlin leh ngei rin a ni a. Kum 73 mi hi a tlin leh a nih chuan Jawaharlal Nehru angin India-a a zawna tum thum prime minister ni thei a ni dawn a ni.
Modi-a hian zuitu a ngah em em a, sorkar tha petu leh khawvel hmuha India vawr liantua ngai tam tak an awm a; mahse, sawiseltute chuan Hindu nationalism a kalpui nasa lutuk a, a bikin hnam leh sakhaw tlem zawkte a nekchep nasa a, sakhaw tihbik nei lo ramah a kal dan hi a dik lo tak zet tia sawiseltu an awm thung.
A rama cheng 80% zet Hindu an nih avang hian Modi-a hian sakhua leh sakhuana kaihhnawih hmanruaah a hmang nasa a, zuitu pawh a ngah phah hle a ni.
Kumin inthlanpuiah hian ‘abki baar, char sau paar [tun tumah hian bial 400 kan tlin dawn]’ tih chu sawi larin BJP leh a thawhpuite nen hei hi lak tlin an tum hle a. Kum 2019-ah khan tling turin bial 272 lak ngai an nih laiin BJP hian amah chauhvin 303 an la tling.
- Amit Shah:
Modi-a heti taka a len chhan hi Home Minister Amit Shah a ni a. Campaign-naa a inlan tawh chinah pawh BJP hi vawi tam tak chakna a lo chanpui tawh thin.
Amah pawh a lar chak em em a, a thlawpute chuan Hindu rinna vawng himtu ang hialin an chhal a. Dan sawisel hlawh tak tak siamnaah pawh a bultumtu nia ngaihna a awm a, heng zingah hian Kashmir inhung bikna dan hlih pawh kha a ruahman nia ngaih a ni a. Muslim dona ang hiala an sawi, Citizenship Amendment Act (CAA) pawh a ruahman nia sawi a ni bawk.
- Yogi Adityanath:
Lukhawlh tul mai, Hindu puithiam, saffron rawng kawr fual ha, politics a khelh hnua Uttar Pradesh chief minister ni ta hi Modi-a dawtah chuan zuitu ngah bera ngaih a ni a. Inthlanpuiah hian ding lo mah se an state hi ram pum dinhmun hril theitu a nih avangin a thlek lam hi a pawimawh tak zet a ni.
A zuitute chuan mi thianghlim ang hialin chhal mah se sawiseltute chuan inthen darhna thehdarhtu politician niin Muslim dona leh duh lohna ang chi thil tam tak vawrh darha sawi thin a ni a. Kum sarih ro a rel tawh chhungin Muslim-te huat zawng a sawi a tam tawh hle.
- Rahul Gandhi:
Ram pum inthlana a party hnehna la chanpui thei lo leh minister pawh vawi khat mah la ni lo, Gandhi-a hi eptu hruaitu hriat hlawh ber zinga mi a ni. Thlahtute atang tawha hriat hlawh niin a pu chu India prime minister hmasa ber, Jawaharlal Nehru-a a ni a, a pi leh a pa pawh prime minister lo ni tawh ve ve an ni bawk.
Tun hnaiah BJP an len chak tak em avangin Congress an hnungtawlh duai duai thung a. Politics a khelh tirh lamah ‘lal fapa’ anga sawi mai thin hi BJP leh leh Congress tlakhniam chhanah hian Gandhi-a hi mi tam tak chuan an puh.
A thawk rim a, a beihna zingah hian ram chhungah thui tak tak kein a kal a, hei hi ‘inhuatna leh hlauhna dova Indian-te inpumkhatna tura a tih’ niin a sawi.
Thawkrimin bei nasa mah se Congress chu BJP hnuaiah tho a awm tura ngaih a ni.
- Sonia Gandhi:
Kum 10 liam taa Congress-in thuneihna an chan lai kha chuan Italian chhul chhuak, Sonia-i hi India-a hmeichhe thiltithei ber pakhat a ni a. Tunah erawh kum 77 a ni ve tawh a, a hriselna a tha tawk tawh lo bawk nen, politics-ah huhang a nei na tawh lo.
Party-ah chuan chairperson ang deuh chu la ni mah se January khan Gandhi-i hi ram rorelna in sang zawkah a insawn ta a, Lok Sabha inthlan hi a chuh dawn lo.
- Priyanka Gandhi:
Inthlan kaihhnawiha hming langsar tak dang chu Priyanka-i hi a ni a, Gandhi-a farnu mi hipna ngah tak hi parliament inthlan a la chuh ngai lo.
A pi, prime minister hlui, Indira Gandhi-i nena an khaikhin fo hi nasa takin Congress tak a campaign a, mipui pawh a hip hle a. Tun tumah hian amah thlawptute chuan inthlan pawh chuh ve ngei se an duh hle a ni.
- Arvind Kejriwal:
Eptu hruaitu zinga tuna lar tak chu Arvind Kejriwal-a hi a ni a, Delhi chief minister hriat hlawh tak niin tunah lung inah a awm mek thung.
Ei rukna donaa beihna kawngah hriat a hlawh hmasa a, naupang tê niin Aam Aadmi Party (AAP) dinin BJP leh Congress chu ram khawpui berah hian a zawnin vawi thum zet a hneh tawh a, tunah hian Punjab-ah ro an rel mek bawk.
March thla khan an party hruaitu lawk tak tak dangte nen man an ni ta thung a. Ei ruk thubuaia an puhnaah hian a pha nasa hle a, sorkar hian politics-a phuba lak nan an hmang niin a sawi a. A thlawptute chuan inthlanah hian AAP an chet chhiat phah an hlau hle.