Nimin May 16, 2024 khan Congress thalai chuan Lunglei Congress Bhawan-ah workers meet an buatsaiha an hun hmanpuitu AICC member Zodintluanga Ralte, ex minister chuan ZPM kaihhruai chuan thla thum velah selna an dawng nasa hle niin a sawi.
India ram state hrang hrangah party hrang hrang an sorkar tih sawiin, “Tun anga thla thum vela sorkar an sel hi a awm ngai lo. Kawng hrang hrangin selna an tawk. Sorkar kal tawhte chu kum 3 velah selna an tawk chauh,’ a ti.
Beiseina sang tak sorkar tharah mipuiin an nei tih sawiin Zodintluanga chuan, ‘Kan CM hi amah leh amah a inhnial ber a ni tawh. Party dang an sawiselna angin an awm char char. Party dang aiin an che phelh tawh,’ a ti a, mipuiten ZPM sorkar zirchiang se a duhthu a sawi.
AICC Member chuan BJP leh ZPM an thawkho a tih ve loh thu sawiin, “Mah se, mipuiin zirchiang teh u. ZPM a sorkar hlima lawmpuina hlana CM Bangla-a kalte kha Mizoram tana BJP-in star campaigner atan an ruat Nagaland Dy. CM leh ex MLA Kikon-ate an nih kha. Kikon lehkhabu phei chu Nagaland CM Neiphiu Rio an release hnuah MZU-ah kan CM-in Feb 16, 2024 khan release nawn leh a ni,’ a ti.
Zodintluanga chuan kan ram, kan hnam leh sakhaw himna atan BJP thawhpui ve ngai lo tur Congress Party candidate Lalbiakzama vote turin mipuite a ngen.
Zodintluanga chuan Congress party chuan kan ram, kan hnam, kan sakhua humhim turin theihtawp kan chhuah dawn a, Lok Sabha ah kan thutna tur chiang takin kan sawi a, BJP kan do a, kan do zel dawn bawk a, MNF pawhin BJP kaihhruai NDA lamah an thu dawn tih an sawi chiang tawh bawk a, ZPM erawh chuan an thutna tur leh an tan tur lam pawh an la sawi thei lo a, an candidate eiruk leh eiruk loh inhnialna chhuak mekah an la buai tawk hle a ni, a ti bawk.