League One lama hmahruai mektu Portsmouth chuan thawhleh zana an khingpui Barnsley lakah si an phurh hmasak zet hnuin hnehna an chang let a, championship-ah an kai sang dawn tih nem ngheh a ni zui nghal bawk.
League One hmahruaitu Portsmouth hian kai sang chiang tura chak mamawh chungin Barnsley chu Fratton Park-ah an mikhual. An mikhual lakah goal chhuah hma viau mah se hun tawp dawn hnaihah an che fuh hlauh a, 3-2 a hnehna changin point thum hlu tak an hmu. Barnsley tan hian Devante Cole chuan minute rukna lekah hmahruaina goal a thun. Hma taka goal an thun vangin phur viau mah se hma erawh an hruai rei lo viau. Si an phurh atanga minute thum hnu lekah Kusini Yengi chuan goal thunin Portsmouth si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Barnsley bawk an che fuh hmasa a, John Mcatee chuan minute 59-naah Barnsley hmahruaina nawn lehna goal a thun. An mualah si an phurh nawn leh vangin Portsmouth dinhmun a chhe hman hle. Goal thun tumin tan khawh viau mah se goal an thun thei lawk lo. Goal thun thei lawk lo mah se an beidawng lova, hun tawp dawn hnaihah an che fuh ta nge nge. Minute 83-naa penalty an hmuh chu Colby Bishop chuan pet goal in an si phurh a sut a. Minute 89-naah Conor Shaughnessy chuan hma an hruai letna goal a thun a, he goal hi an chakpui a, point thum hlu tak an hmu.
An muala an chakna hmangin Portsmouth hian khelh 44 atangin point 94 an hmu a, an hnuai chiaha awm Derby County aiin point 8 in an sang zawk a, championship-ah an kaisang thei dawn tih a chiang zui nghal.