English Premier League club lian Tottenham Hotspurs player pawimawh ni thin, England tan vawi 33 zet khel a goal thum thun tawhtu Dele Alli chuan nun kawng bumboh tak a zawh. Club leh ram tan beiseiawm taka a inlan laiin beisei a phak lo thuai a, hma takah a zuihral a ni ber. A nunchangin a zir loh vangin a buai zual zel a, Everton tan pawh hmun a chang phak tawh lo va, loan in Besiktas a zawm ta hial. Khelmual chhunga harsatna lian tak tawk Dele Alli hian Garry Neville nen an inkawm tumin zing kawng harsa tak a lo zawh thin, harsa taka nun bul a tan dan a sawichhuak a. He a thusawi vang hian lainat a hlawh thar hle.
“Kan nun bul tan dan pahnih khat lek sawiin bul tan ta ila, zin kawng harsa tak ka zawh chhoh dan in chhui dawn thei ruak ang”, tiin Alli chuan bul a tan a. A hringnun a zin kawng harsa leh hreawm a tawh thinte lungchhe takin a sawi chhunzawm.
“Ka nu hi zu ngawl vei a ni a, nu hmangaihna leh ngaihsakna ka dawng tam lo. Ka nu thian nu, kan ina lo leng fo thin chuan kum ruk mi lek ka nih laiin sex-ah min khawih chhia. Africa-ah ka pa hnena khawsa a, nun tha zir turin min thawn a. Thla ruk hnu lekah UK-ah thawn let leh ka ni a, hun hreawm takin min lo hmuak zui leh nghal zat.”
“Kum sarih mi lek ka nih laiin zial ka zu tan a. Kum riat ka nih laiin ruihhlo ka zuar tan a, Thirsakawrah ruihhlo thukru chungin ka tlankual a, a langa mawiah football ka phur ve thin a, a hnuaia awm chu Drugs a ni. Drugs pawh ka khawih ve thuai. Ka hun tawn kha a thim lutuk a, thim zin hnan ang tlat ka ni. Ka hun tawn hreawm tak vangin ka mu thei ngai lova, ka mut theih loh vangin mutna damdawi ka ei a ngai. Sleeping tel lovin ka awm hleithei ta lova, a ngawi ka vei zui ta hial a ni”.
“Football khelin hun ka hmang chho a, hun hlimawm leh chhinchhiahtlak ka tawng ve thin. Pangngai takin hun hmang ve thin mahila ka thil tih tha lovin min thing let a, sualah ka tlu zui leh. Mut hmunah nun hlui chhui letin nun hreawm ka hmang a. Khawvarin hreawmna dang arawn herchhuahpui leh thin a ni ber. Nun bik takin min sal bet chungin traning naah hlim hmel ka pu lui a. Ka nui hmel phena ka hreawmna leh ka ipikna zozai erawh min hmuhpui thiam an awm lo. Insiamthat ka mamawh tih ka hria a, nun kawng dik zawh turin ka bei ngial bawk. Ka tana tha ber turah ngaiin Rehab-ah ka lut. Rehab-ah lut turin tuman min nawr lui lova, ka duhthlanna ngeia lut ka ni” tiin a sawi a, a changin a mit tui a tla. A thusawi lungkuai tak hian Garry Neville mittui pawh a thlemchhuak hial.
A thawnthu lungchhiat tak Dele Alli-a’n sawi a, a mittui a tlak lai hian amah kawmtu Garry Neville chuan, “Pawi tih thu i sawi a ngai lo a nia”, tiin a mittui luang a hruksak. He an inkawmna hian mi tamtakin Dele Alli an hmuhdan a thlak thleng hlawk. Deu tu, sit tu leh nuihtute pawhin an lainat thar a, an thlawpna thu an sawichhuak nghal hlawm.
England captain Harry Kane chuan England tana a khelhpui thin Dele Alli-a’n a hun tawn hreawm tak zep nei lo, tlang taka a sawi chu chhuanawm a tih thu a sawi a. A thil tawn ngei a sawichhuak chuan mi dang a puih ngei a rin thu a sawi nghal var a. England striker hlui Gary Lineker pawhin Dele Alli thusawi chu, “thusawi huaisen leh thil tithei’ tia sawiin England player hlui duhsakna a hlan nghal a. Professional Footballers’ Association chuan Dele chu ‘Mi huaisen’ tiin fakna thu an chhakchhuak ve nghal var bawk. An ni mai hi an ni lova, Dele-a club hlui MK Dons chuan an player hlui hi an chhuan thu leh eng lai pawha an thlawp reng thu an tarlang thuai bawk.
- Dele Alli chu
Football a khelh hnua hmasawn chak tak PFA Young Player of the Year chawimawina hial pawh lo dawng tawh Dele Alli hi a pa chu Nigeria mi Yoruba a ni a. Anu hi UK mi Denise a ni ve thung. 11 April 1996 khan Milton Keynes, Buckinghamshire-ah a piang a. A laiah hming chu Bamidele Jermaine Alli a ni. Nu zu ngawl vei kiangah sei lian a, hun hreawm leh tha lo tak a hman hnuin Alan leh Sally Hickford ten an fa atan an la a, an enkawl chhunzawm. Fa atana la tute hi mi tha tak mai an ni a, lainatna leh hmangaihna nen Dele hi an enkawl. A nu leh pa tharte kiangah nun bul a tan thar leh hian a tir lamah inkilhtawih viau mah se a tlangnel chho ve zel. Nun kawng dik a zawh zui ta hial.
Kum 12 a nih lai atangin football a khel tan a, Milton Keynes Dons (MK Dons) atangin football nun bul a tan a, hma a sawn chak viau. Hetihlai hian UK-a rawlthar tha ber zingah a tel a, kum 2024-15 khan Football League Young Player of the Year-ah thlan a ni a. Hemi kum vek hian MK Dons ‘Player’s Player of the Year’ ah thlan a ni tel bawk.
MK Dons tan a khelh that theih em vangin kum 2015 khan London club lian Tottenham Hotspurs in an la lut. Tottenham tan hian a khel tha chho viau a, kum 2015-16 khan a vawi khat nan ‘PFA Young Player of the Year’ ah thlan a ni a. 2016-17 khan he chawimawina hi a dawng nawn leh bawk. Hma a sawn chak em vangin a lakah Tottenham leh England in beiseina an nei sang hle. Spurs tan hian inelna hrang hrangah vawi 269 a khel a, goal 67 a thun. Kum 2015 atangin England tan a khel tan a, ram tan kum li chhung a khelh chhungin vawi vawi 37 a khel a, goal thum a thun hman.
Tottenham-ah a vul viau laiin a nun chang a hloh a, Zu a in nasa chho ta viau. Zu a in nasat vangin a tlahniam duai duai a, kum 2019 hnu lamah England tan a khel phak leh ngai tawh lo. Kum 2022 khan Everton in an la lut a, Everton-ah pawh hmun pawimawh a chang phak lo zui leh a, loan in Besiktas a zawm. Besiktas atangin Everton-ah a kir leh tawh a, nungchang tha zawk neiin mualchhung leh pawnah harhtharna changin, a ropuina neih let leh tumin tan a khawh leh mek a ni.