Gulf ramte chu ruah tam tak surin a tibuai a, sabereka khuangkaih siamin khawvela thlawhna tumhmun lun ber pawh an buai a, lut leh chhuak tur tam tak an kawng thlaksak an ni.
Dubai Airport chuan hna an thawk thei ‘rih lo’ tih an sawi a, a hnu rei vak lovah erawh an thawk chhunzawm leh nghal thung.
Oman-a thuneitute chuan tui lian avangin mi 18 vel an thi niin an sawi.
Ram eng emaw zat chuan ni khat thil thu-ah kum khata an dawn zat ang dawn ruah an dawn hlawm thu an sawi hlawm.
Dubai International Airport atanga video lak darh pakhatah chuan thlawhnate chuan tui fawnin tlankawng a chim lai mekin an insaseng tih a hmuh theih.
Airport-in thuchhuah a siamah chuan Thawhlehni zana thlawk lut turte chu ‘UAE-in a la tawn ngai loh khaw awm dan dik lo tak avangin’ hmun dangah tum turin an ti a ni.
Chhuak tur lam erawh dan pangngaia chhunzawm leh theih a nih thu an sawi a. Darkar hnih lai an buai hnuah dan pangngaiin hna an thawk chhunzawm leh thei a ni.
Thawhlehni tukah khan UAE-a National Centre of Meteorology chuan khaw awm dan dik lo tur hi puangin Abu Dhabi, Dubai leh Sharjah huamin ruah a sur nasa dawn tih an sawi lawk.
Gulf ramte hi khaw lum leh ro tia hriat lar an ni a, tun hnai kum eng emaw zat erawh ruah sur nasa avanga tui lian an tawng ve fo tawh thung.
An thenawm, Oman-ah pawh tui lian avanga thi chu mi 18 an tling tawh tih an sawi a, mi eng emaw zat chin an la hre lo bawk a. Thi zingah hian zirlai 10, kum 10 leh 15 pawh telin April 14 khan lirtheia tui lian kân an tum chu tui lianin a la ta nia hriat a ni.
Bahrain-ah pawh thlalak leh video darhah chuan tuiin a chim kawngpuiah lirthei an tang nasa hle.
Scientist-te chuan sik leh sa inthlak nasa avangin tun hma lama thleng ngai lo khaw awm dan uchuak tak tak a tam a. Khawvel lum zel avangin thil thleng apiang a na telh telh zel dawn bawk niin an sawi.
Khaw lum lam hi 1°C-a a san rualin boruakin hnawng a ken hi 7%-in a pung ve zel a. Hei hian ruah mal leh ruah tam zawk surna remchang a siam a, hun rei lote leh hmun zim taka ruah bawhawk sur a thlen tam phah thei niin an sawi.