NBA regular season 2023-24 khelh zawh a ni tawh a, play-off khel phak tur zawnna ‘play-in’ khelh leh mek a ni. Nilaini zinga play in khelhah Los Angeles Lakers in Pelcans hnehin play-off khel turin an tling. Lakers an chak lai hian Golden State Warriors an tlawm a, play-off khel phak lovin an tla ve thung.
Western Conference-ah pasarihna Los Angeles Lakers hian ‘play in’ ah New Orleans Pelicans an hmachhawn a, bul tan tha lo mah se inkhel hmuhnawm takah point li in hnehna an chang hram. Lakers hian Palicans lakah bul an tan tha lova, quarter hmasa berah point 8 in hnufual zawkah an tang nghal. Quarter hmasa berah hnufual zawkah tang mah se an insiamtha thuai. Quarter hnihnaah point 18 zetin an chungnung a, point 10 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau. Quarter thumnaah point thumin Pelicans an chungnung a, an inkar an tizim. Quarter hnuhnung berah Pelicans hi point thumin an chungnung zui leh. Chawlhlawk hnu lamah chungnung zawkah tang ve ve mah se Pelicans hian point 4 in an khingpui LA Lakers an umphak lova, uiawm takin tlawm zawkah an tang zui ta a ni. Pelicans lakah an chak vangin LA Lakers hi play-off khel turin an tling chiang nghal a. Play-off final round-ah champion lai Denver Nuggets an hmachhawn ang a, fiahna hautak an hmachhawn ang. Lakers lakah tlawm mah se Pelicans tan play-off khelh theihna remchang a la awm a, pathianni khian Sacramento Kings an hmachhawn leh ang a, an chak chuan Western Conference-ah pariatna niin play-off an khel phak chiah chiah ang.
New Orleans Pelicans an hneh tum hian Basketballer ropui ang hiala ngaih LeBron James a chetha viau. NBA ah vawi li champion tawh James hian point 23 a thawkchhuak a, ball sawhlet vawi kua a dawn bakah assist vawi kua a nei tling bawk. James hian NBA-ah season 21 chhung hun a hmang tawh a, tun hi play-off vawi 17 a khelhna tur a ni. Lebron James hian NBA-ah hming a chher lian deuh deuh zel a. Play-off final an thleng a, an champion hlauh a nih phei chuan Basketballer ropui ber a nihna a nemnghet leh zual ngei ang. Ropui tehna hrang hrangah elpui lian nei bawk mah se Jame hian chhingtu a nei lo.
Nilaini zinga inkhel dangah Golden State Warriors chu Sacramento Kings hneh lovin an tlawm a, play-off khel phak lovin an tla. Warriors hi Kings lakah an khel tha lo viau a, quarter khatah chiah an chungnung a, a dang zawngah hnufual zawkah an tang vek. An khingpui Kings te hi point 24 zetin an ngam lova, play-off khelh phak an beiseina a tawp fel chiang hle.
Golden State Warriors an hneh tum hian Sacramento Kings tan Keegan Murray chuan point 32 a thawkchhuak a, ball sawhlet vawi kua a dawng tling bawk. Kings tan hian De’Aaron Fox chuan point 24 a thawkchhuak ve bawk.
Tukin hian Eastern Conference lam a mi ten play in an khel ve leh dawn. Miami Heat leh Philadelphia 76ers te an intum ang a, Atlanta Hawks leh Chicago Bulls an inhmachhawn ve bawk ang.
Western Conference atangin Boston Celtics, New York Knicks, Milwaukee Bucks, Cleveland Cavaliers, Orlando Magic leh Indiana Pacers te play-off khel turin an tling a. Eastern Conference atangin Oklahoma City Thunder, Denver Nuggets, Minnesota Timberwolves, Los Angeles Clippers, Dallas Mavericks leh Phoenix Suns te play-off khel turin an tling ve bawk