Thawhlehni khan hun hmasa lama Olympic an tanna Greece rama Olympia hmunah Paris 2024 Olympic Games meichher chhitkaina hun (Olympic Flame lighting ceremony) an hmang a, hei hi kum sarih zet inbuatsaihna kalpui a nih hnua kumin July ni 26 atanga tan chhoh tawh tur Olympic inbuatsaih hmawrbawkna lam a ni tawh.
Hmanlaia an tihdan zulzuiin hmeichhe puithiam (High Priestess) lema insiam, Greek actress Mary Mina chuan meichher tlanpui hmasaber tura ruat Greece Olympic rowing champion Stefanos Ntouskos kuta meichher chu chhikaiin, tawite a tlanpui hnuah Ntouskos hian a torch ken chu France tana swimming kaltlanga Olympic medal pathum la tling leh Paris Olympic torch relay buaipuina kawnga an hotupa ber ni bawk Laure Manaudou hnenah a hlan zui nghal.
He meichher hi ni 11 chhung Greece ramah an tlankualpui phawt ang a, April ni 26 khian kum 1896 daih tawha modern Games hmasaber an nghahna hmun Athens khawpuia Panathenaic stadium-ah Paris Games organisers-te’n an lo dawngsawng dawn a ni.
Ti chuan, a tukah a bik taka buatsaih lawng hmangin France ramah an phurlut ang a, May ni 8 khian France ram chhim lama lawngchawlhna upa tawh tak Marseille thlengin, tah chuan a lawmna hun buatsaih a ni dawn a, mipui 150,000 lai pungkhawm tura ruahmanna siam a ni.
Marseille khawpuia meichher kengtu (torch bearer) hnuhnungber chuan May ni 9 khian Velodrome stadium chungah a lawnpui dawn tih organiser-te chuan an sawi.
Paris 2024 Olympics Olympic Flame lighting ceremony-ah hian a thlirtute pawh France flag rawng thuamin an inbel a; he French torch relay hian ni 68 chhung awhin, July ni 26 khian Paris khawpuiah meichher kalkualpui chu an zo ang a, Olympic meipui (Olympic flame) an chhikai tawh ang.