Thawhleh zan, zan lai khan UEFA Champions League quarter-final second leg khelh tan a ni a, PSG in an muala an hneh loh FC Barcelona an hneh let a, semi-final an lut. Inkhel dangah Borussia Dortmund pawhin Mimuala an hneh loh Atletico Madrid chu an mualah an lo hneh a, semi-final an lut ve bawk. PSG leh Dortmund te hi semi-final-ah an inhmachhawn zui ang.
- Bul tan tha, tawp khar chhiah Barca
La Liga champion FC Barcelona hian Paris St-Germain mual; Parc des Princes-ah 3-2 in hnehna an lo chang tawh a. An mualah hma taka goal an thun leh bawk vangin semi-final luh theihna hun tha tak an nei hman. Hma taka goal an thun ang bawkin hma takah kim lo zawk an ni bawk a, kim lo zawk an nihna hi tuar in, an mualah ngei 4-1 in an tlawm zui ta a ni.
An mualah hnehna chan ngei tuma inlan Barcelona hian bul an tan tha a, Raphinha chuan minute 12-na lekah hmahruaina goal a thun nghal. Hma taka goal an thun hian Catalan team a fuih phur viau a, si hniha hma an hruai fal vangin semi-final lut turin an dinhmun a tha hman viau bawk. PSG hneh nawn leh an beiseina chu ‘beiseina thamral’ mai a ni zui ta tlat thung.
Si belhkhawmah si hniha hmahruai fal tawh Barca hian PSG nawr let an tuar lo. Barca defender pawimawh Ronald Araujo chuan Bradley Barcola ball khalh tlang tur a titlu. Araujo hi last man a ngaih a ni lo mah se referee Istvan Kovacs chuan a hnawtchhuak tlat thung. Referee Istvan Kovacs thutlukna hian sawi zui a hlawh hle a, he thutlukna hi Barca chhiat in tanna bul a ni ta chiah bawk.
Tam zawk an nih hnuin PSG an phur a, an khingpuite an nawrzui ta viau bawk. Barcelona player hlui Ousmane Dembélé chuan minute 40-naah goal thunin an si phurh a sut a, 1-1 a inhnehtawk chungin chawlhlawk an hmang.
Si belhkhawmah chungnung zawk an la nih tho vangin Barca hian chawlhlawk hnu lamah an goal venhim tum viau mah se an hlawhchham thuai. PSG tan hian Vitinha chuan minute 54-na lekah goal thunin an si phurh a sut a, si belhkhawmah 4-4 a ni chiah a, chungnung zawk an awm ta lo.
Vitinha goal thun hian PSG a fuih phur viau a, goal pawh an thun belh leh thuai bawk. An goal venga tan khawh nasa tak Barca hi an chesual nawn leh a, penalty an chawi. He penlalty hi PSG player pawimawh Kylian Mbappé chuan a pet goal a, minute 61-naah hma an hruai letna goal a thun.
Hma an hruai let hnuin PSG an khel tha zui viau a, hun tawp dawn tepah goal dang an thun belh leh. An inkhelh hmasak tuma langsar lo tak Kylian Mbappe chuan minute 89-naah an goal lina thunin an hmahruaina a tizau. Mbappe goal hnihna a luh hnu hian goal dang a luh belh tawh lo va, PSG chuan si belhkhawmah 6-4 ngawtin hnehna an chang a, FC Barceliona a hnawtchhuak. PSG hi kum 2017 khan an mikhual Barcelona lakah chiang taka an chak hnuin Nou Camp-ah an lo mualpho tawh a, 2017-a an mualpho tawhna khuh mawiin Catalan club lian lakah phuba an la ta a ni.
- Dortmund an chak nuamsa
PSG in Barcelona an lehthal rual hian German club lian Borussia Dortmund chuan Atletico Madrid an lehthal a, PSG hmachhawn turin semi-final an lut ve bawk.
Dortmund hi 2-1-a an hneh loh tawh Atletico Madrid lakah an khel tha viau a, goal li ngawt an thun. Minute 34-naah Julian Brandt chuan hmahruaina goal a thun. Hmahruaina goal an thun atanga minute nga hnu lawkah Ian Maatsen chuan an goal hnihna a thun belh zui leh a, si hnih faia hmahruai chungin chawlhlawk an hmang.
Chawlhlawk hnu lamah Atletico Madrid in bul an tan tha ve thung a, goal hnih an thun zawn. Mats Hummels chuan minute (49-naah an lamah a ti-goal a, Atletico si phurh a sut then. Hemi hnu hian Ángel Correa chua goal a thun zui leh a, si belhkhawmah Atletico Madrid in hma an hruai let leh ta chiah. Goal hnih an chhuah zawn hnuin Dortmund tan hian Niclas Füllkrug leh Marcel Sabitzer ten goal an thun zui leh a, si belhkhawmah 5-4 a hnehna changin, semi-final an inhlangkai zui ta a ni.