Football Association leh Premier League thuneitute chuan FA Cup chungchang an ngaihtuah ho a, kum 2024-25 season atangin FA Cup-a inkhelh nawn (replay) tihbo an remti. FA Cup leh EPL fixture insu buai lo turin ruahmanna an siam bawk.
FA Cup round tir lamah team inhnehtawkte an inkhel nawn leh thin a, hei hian hun a heh lutuk nia ngaihna lian tak a awm. FA leh Premier League lam ten sawihona an neih hnuin season thar atang chuan FA Cup-ah replay a awm tawh dawn lova, inhnehtawk an awm a nih pawhin penalty shootout hmangin chin fel zui a ni ang.
FA leh EPL thuneitute hian chawlhkar tawp lam zelah FA Cup match awm zel turin inremna an nei a. Fifth round erawh chawlhkar laihawlah khelh a ni zeuh thung ang. EPL nen fixture inthuah a awm lohna turin ruahmanna siam a ni bawk.
Inelna lian leh hlun tak FA Cup-ah hian League One leh League Two team ten first round an hmachhawn a. EPL leh championship club te chu third round atangin an inlan tan ve thung.