Gujarat-a Vadodara Traffic Police chuan nipui khaw lum leh ni sa lutuk laka himna tur thil an duang chhuak thar a. A bik taka siam air-conditioned helmet chu thawktute hnenah an pe.
AC helmet hi khaw lum vanglai, 40-42°C hnuaiah pawh khawlaia ding police dingte tihdaihna atana tih a ni.
Heng helmet-te hi thil hrang hranga thuam a ni a. Niin mit a ên nasat lutuk laka himna atan shield dah a nih bakah charging point a awm bawk a. A full-a charge chuan helmet hian a khumtu chu darkar riat thleng a vawng dai thei a ni.
Khawlaia duty-te hi ni sa lutuk tuar zo lovin an tlu fo tawh thin a. A enchhina atana an pek traffic police-te chuan an khum hnuah chuan a ziaawm hle a, an hna pawh tha taka an thawh theih phah niin an sawi.
ANI News-in X-a video an dah chhuahah chuan traffic police pathumin khawlaia AC helmet khuma an duty lai a lang a. A lo hmutu vantlangte pawhin a tha zawngin an fak nasa hle a, hmasawnna lian tak niin an sawi.
Pakhat chuan, “Hmasawnna duhawm tak a ni a, state danga traffic department-te pawh hian hetiang hi ti ve zel se a tha ang,” tiin Odisha Police Department pawhin an âwn ve niin a tar lang bawk.
Mi dang pawhin, “Khaw lum lutuk laka himna atana nghahhlelhawm tak hmuh chhuah a ni ta a ni,” a ti a. “India ram puma hman chi a ni,” a ti.
Hetiang hi Uttar Pradesh-a Kanpur-ah pawh traffic police hman turin an ti bawk.
DCP Traffic Aarti Singh chuan ANI News hnenah, “Tunah rih chuan helmet-te hi enchhin mek chauh la niin khawpui chhunga hmun lun zual paruka duty traffic police hnenah pek an ni a, a hlawhtling hle a. Heng AC helmet-te hi hmun danga duty hnenah pawh pek zel an ni ang,” a ti.