Khawvel inthlanpui lian ber, India ram inthlan lo awm tur atan Zirtawpni atangin vote thlak tan a ni dawn a. Hmarchhak kilah chuan thawktuten mipuiin vote an thlakna tur an panna kawng a khirh hlawm hle.
A ram a chhengchhia a, khaw awm danin a zir lo em em bawk a. Inthlan buaipuite chu polling station kilkhawr tak tak panin an feh chhuak a, a hautak thin hle niin Election Commission of India (ECI) chuan a sawi.
Arunachal Pradesh-ah chuan Lok Sabha leh state assembly inthlan lo awm tur atan a buaipuitu mi 11,130 bakah Electronic Voting Machine (EVM) 6,874 nen an thawk chhuak a. Union home ministry chuan venhim hna thawktu company 80, Central Armed Police Force (CAPF) 7,500 tirh an ni bawk tih a sawi.
Vote thlakna hmanruate a him theih nan a bik taka ruahmanna siam a ni a. Inthlan buaipuitute hi tui luh tlang theih lohna ip (waterproof bag) pek theuh an ni a, rawng danglam bik tak a nih bakah rain jacket nena thuam an ni a. Heng hmanrua an pekte hi EVM a himna atana tih a ni a, a bik takin ruahpui vanawn a sur laka him nan a ni.
Social media-a thlalak leh video darhah chuan inthlan buaipuite hi tlangram chhengchhe tak taka an kal lai a lang.
Arunachal Pradesh-a Siang district, Payum Circle huam chhunga lak video pakhatah chuan polling station an panna kawng hi a chhe tak zet tih a lang thei a. Video-ah hian tlangram awih takah thawktute hi an kal a, thing leh hnima inpawtin an kal tawk tawk a ni ber a. Clip pakhat darh pakhatah pawh Nagaland-a Kiphire district, Hakumati polling station panna kawng chhe tak pawh tihlan a ni bawk.
Hmun thenkhatah chuan inthlan buaipuitute bakah police-te hi thlawhna hmangin phurh an ni a. Polling station tam tak hi China nena inrina lai vela awm a ni.
Arunachal Pradesh Chief Electoral Officer Pawan Kumar Sain chuan hetianga hmun hautak leh khirh tak tak pantu thawktute an fakawm tak zet thu a sawi.
“Ruahmanna bik kan siam a. Polling station 228 chu kea kal ngai a ni a. Inthlan nia khaw awm dan tur kan thlir reng bawk a, rawng inang lo special waterproof bag pahnih zel kan pe a, hei hi EVM him nan leh a inpawlhsawp loh nana tih a ni,” tiin Sain chuan a sawi.
Tlang sang tak, Ladakh atanga vurin a khuh reng, Himachal Pradesh-ah pawh polling station a awm a ngai a, puan in zarin polling booth siam chawp a ngai a. Heng hmun kilkhawr zual buaipui tur phei hi chuan a thlaa thla hun hman a ngai a ni.
Kum 2024 Lok Sabha inthlan hi thawh sarihin neih tur a ni a, April 19 atanga vote thlak takin June 1 thleng awh tur a ni dawn a. Thawh tinah hian state leh union territory hrang hrang a tuam a, vote hi June 4-ah chhiar a ni ang.
Thawh khatnaa vote thlak tur zingah hian Arunachal Pradesh, Assam, Bihar, Chhattisgarh, Madhya Pradesh, Maharashtra, Rajasthan, Tamil Nadu, Uttar Pradesh, West Bengal, Jammu & Kashmir, Lakshadweep leh Puducherry te pawh an tel a ni.