Hliam thawhsanin Thawhlehni khan Barcelona Open-ah a kir a, first round-ah straight-set hmangin kum 21 leka upa, tawnhriat nei chau Italian 62nd-ranked Flavio Cobolli hnehin first round a paltlang a, Nilainiah erawh round two paltlang zo loin Alex de Minaur chuan 7-5 6-1-in he tournament-a tum 12 ngawt champion tawh Rafael Nadal hi a hnawtchhuak.
Spaniard Nadal hian January 2023 atang khan he thu buatsaih lai thleng hian match nga chih a la khel tling a; French Open inbuatsaihna Barcelona Open-ah beiseiawm takin bul tan bawk mah se world number 11 De Minaur a paltlang zo ta lo a ni.
Tarlan tak angin, thla thum a chawlh hnuah kum 37 mi Nadal chuan inelna a hmachhawn leh thei hram a; hliam avanga a chawlh deuh reng avangin ATP ranking-a a dinhmun pawh 644-na daih ni tawhin, hliamin a kiansan thei lo a nih ch uan kumin bak hi inelna hmachhawn zui zel a tum tawh loh thu a lo sawichhuak tawh nghe nghe a ni.
Grand slam singles title 22 la tling tawh Nadal hian a chawlh hma ngeia a ropuina mual French Open daidar leh a chak thu a lo sawi tawh thin a; kumin hian champion ngun ber record siama men’s singles title 14 a lak tawhna Roland Garros grans slam tournament-ah hian a inlan thei dawn em a chian loh ruai laiin inbuatsaihna Barcelona Open-ah harsatna lian tawk loin match hnih a khel thei a, thla thara khelh tur French Open-a a tel theih a beiseiawm chho zel rih.
World number one hlui Nadal hian French Open khel turin a fit pumhlum hman a inbeisei thu a sawi a, De Minaur match an khelh tum pawh khan hun tawp lamah intihnat leh palh hlauhthawn thilah a thapui a khek then tih a sawi!
Kum 25 mi Australian hneh loa Nadal-a khelmual chhuahsan lai hi Barcelona mipuiin ‘standing ovation’ nen an thlahliam a ni.
Nilaini vek khan British men’s number two Jack Draper chuan Munich khawpuia clay-court event BMW Open-ah a vawi 10-na atan ATP Tour quarter-final a lut a; he hmun thleng tur hian German world number 179 Rudolf Molleker lakah kum 22-a upa Draper hian 4-6 6-1 6-1 hnehna a chang.