Lok Sabha inthlanpui vote thlak thawhkhatnaah Mizoramah pawh boruak muanawm tak hnuaiah mipuiten vote an thlak a, buaina leh harsatna lian tham thleng a awm hriat a ni lo.
Inthlan vote thlak hi zing dar 7 atanga tan a ni a, chawhma lamah vote tla a tha vak lo a, chawhnu her atangin vote tla a tha chho tan a, polling station hi tlai dar 5 thleng hawn tur ni mah se hmun thenkhatah chuan vote thlak hun a tawp hnuah vote thlak hman lo, polling area-a lut hman te chu vote thlak tir an ni.
Additional Chief Electoral Officer Dr H. Lianzela chuan inthlanna chu tluang taka neih a nih thute, dan leh thupek kenkawh kawngah pawh harsatna a awm lo a, vote thlakna hmanrua khawl thenkhat chu thlak ngai awm mah se buaina lian tham erawh a thlen loa tluang taka vote thlak theih a nih thu a sawi.
Dr H. Lianzela chuan inthlanna felfai, muanawm leh zalen taka neih a nih theih nana thawktu election department, bakah mawhphurhna hrang hrang neitute chungah lawm thu a sawi a, sorkar mi te bakah MPF, Kohhran leh NGO te’n theih tawp chhuaha inthlanna felfai a awm theih nana hma an laknaah an lawm hle tih a sawi bawk a ni.
Mizoram People Forum general headquarters hruaitute chu hmun hrang hrangah in sem darhin vote thlakna hmun hi an tlawh kual a, an Vice president Rev. VL Luaia Hranleh chuan boruak muanawm tak hnuaiah mipui te’n vote an thlak nia an hriat thu a sawi.
Lok Sabha MP inthlanpuiah hian vote nei mi nuai 8 sing 5 sang 6 leh 364 (8,56,364) an awm a, hriat theih china vawiin tlai dar 3 thlenga vote tlak tawh danah chuan mi 438590 in vote an thlak tawh a, hei hi za zela 51.22 a ni a, vote tlak thatna ber district chu Lawngtlai a ni. Tlai dar 5 hnuah pawh vote thlakte an la awm avangin vote tla hi a la pung zel tura ngaih a ni a, hetihlai hian Election department lam chuan vote tla hi za zela 70 a tlin phak an beisei chiah lo a ni.