Inrinni leh Pathianni zanah inelna ngaihhlut hlawh leh upa tak FA Cup semi-final khelh a ni dawn.
Inrinni zan hian champion lai Manchester City leh Chelsea an inkhel ang a. Pathianni zanah Coventry City leh Manchester United te an inhmachhawn ve thung ang. Semi-final hi England a khelmual ropui ber Wembley Stadium-ah khelh a ni dawn a, City leh United in an khingpuite an hneh ve ve a nih chuan final ah Manchester derby hmuh tur a awm dawn. Final-ah Manchester City leh Manchester United te an inhmachhawn a nih chua final duhthusam a ni ngei ang.
Season liam taah a vawi khat nana treble champion Manchester City hi nilai zan khan Etihad Stadium-a a mikhual Real Madrid hneh lovin an tlawm a, champions league semi-final lut zo lovin an tla. UCL atanga an tlak vangin treble champion nih nawn leh an tumna a tawp fel. FA Cup-ah Chelsea hneh lova an tlawm a nih phei chuan trophy lian lak nei lovin season khar thei dinhmunah an ding. Carbao Cup leh UCL-ah an champion lo chiang tawh a, FA Cup leh EPL-ah champion beiseina an la nei. EPL-ah champion tumin an nawr na hle a, champion tur rin thiam a la har hle.
Team lian Chelsea hian season kal mekah beisei an phak lova, FA Cup hi trophy an lak theih hnaivai ber a ni. City an hneh lo a nih chuan kut bengin season an khar dawn. Inelna dangah beisei an neih tawh loh vangin FA Cup final luh ngei tumin tan an khawh dawn a, thih thah tak meuh meuhin City an hmachhawn ang.
Pathianni zan hian FA Cup-a champion tam ber dawttu Manchester United chuan Coventry City an hmachhawn dawn a. Harsatna lian tawk lovin United hian hnehna an chang thei tura ngaih a ni a, champion turin rin an kai viau rih.