- Lallunghnema, Charity Lodge
Consumer Huang chhuak hnuhnung berah khan Two Wheeler Taxi khalhtu fel tak chanchin ka rawn ziak tawh a.
Chhiar pawh a hlawh viauin ka hria. Kha Two Wheeler Pu khan taxi fare ei ruk a duh lo va, ei ruk a hnehin a haw zawk a ni. Khatiang mi rilru tha kha an entawn tlak hle a. An tam lo hle bawk.Kha Taxi Pu ang kha kan mamawh chu a ni si a.
18th.April.2024: Vawiina ka thil tawn hi ngawih bopui mai mai chî niin ka hre lova, chuvangin ka han au chhuah pui leh ngawt mai a ni. Thil thleng duhawm tak a ni miau si a.
He Consumer Column lo chhiartute hi in thil lei leh hmanna kawnga in thil tawn hriatte chu min lo hrilh thin turin ka ngenin ka sawm che u a ni. Mi fel leh mi tha chanchin sawi hi a nuam a, ngaihthlak nin theih pawh a ni lo. Chutiang mi in hriat chuan min lo hrilh zel u la, he column-ah hian kan tarlang thin dawn a ni. Harsatna nei in awm pashin in jarsatna chu kan nbaithla zel ang.
Tin, heti a ni a, kan kohhran chhungkua lusun ina lêng turin two wheeler taxi – ah ka chuang a. Khawhar chhungte in ka thlen dawn hnaihah ka chhuk thla a. Taxi fare chu pek ka tumim cheng za note ka han phawrh a. Taxi Pu chuan pawisa nawi a neih remchan loh thu min hrilh a.A buaithlak tan ta hle mai!Tichuan, indawr tan ta!kan inbiakna hi lo ngaithla teh u, a ngaihnawm asin..
Keimah: Cheng 40 ka pe thin a…
Taxi Pu : Ka pu, pawisa thlengna ka va nei âwm love!
Keimah: Niminah(yesterday) pawh Taxi Driver-in pawisa thlengna tur a neih loh avangin min batsak tawh a. Mahse, pek a ngai lo, ka ti a. Kan inhriat phah ang…
Taxi Driver : Rs. 100/- note hi chu la kir leh mai rawh. Min Gpay mai dawn nia.
Keimah : A buaithlak mai mai e a, nang man tura a fare Rs. 40/- bak cheng bo hi min gpay zawk ta che.
Taxi Driver : Ka pu min pe lo mai rawh. Ti khan ka thlah che ni mai alawm. Ka free ang che.
Keimah: E khai! A tul lo, i inpekna hi a ropui lutuk! Taxi Pu fel tak i ni. A thlawna inthlah ringawt chu a dik thei lovang. Inhmel hriatsa pawh kan ni si lo. Nangni ang hi kan tawng ngai meuh lo. Ka lawm lutuk. Khawi vengah nge i awm, i hmingte min hrilh ta che. I phone number leh i hming min hrilh teh. Kei hi Consumer Activist ka ni a, lehkha ziak thin ka ni a, chhinchhiah che ka duh. Ka thu ziakah ka lo tarlang teh ang. Nangni ang, mi harsatna hre thiam, mi tlawm ngai hi an tam lo teh a nia!. Nang ang vek hi ni ula… Kan chenna Zawlkhawpui hi chu a nuam ngawt ang.
Taxi Pu : Ka pu sawi kher a ngai lo,a mualpho thlak a e! I tih tlat chuan: Lza ka nia, Tuikual North-ah ka awm.
Keimah : I phone number, leh i taxi number min hrilh rawh. Mite tan malsawmna ni zel ang che.Pathianin a hruai zel ang che Ka lawm e.
Heti hi a ni a… LZa ang hi nih vek i tum ang u… Taxi Pu pakhat ka hma chhawn tawh nen kha chuan an va in fel hleih em!
Thil dangah kan hawi leh ang a.Consumer-te harsatna chingfeltu Mizoramah hian Consumer Commission kan nei a. State Consumer Commission pakhat, District pariatah District Consumer Commission kan nei mek bawk. He thu ziaktu pawh hi Aizawl District Consumer Disputes Redressal Forum (tunah chuan Commission a ni tawh) ah Member ka ni ve tawh a. Dinhmun bîk nei an nih avangin henga President leh Member-te hi Hon’ble President, Hon’ble Member tih an ni thin bawk.
Tunah hian Aizawl District Consumer Disputes Redressal Commission Judgement ka rawn tarlang dawn a ni.
Judgement Order
CC No. 33 of 2021
Malsawmkima Royte — Complainant.
Verses
1) Bajaj Allianz General Insurance Company Ltd., Bawngkawn — Opposite Party.
2) Zothan Motor Works
Lunglei Road, Bawngkawn — Date of heaving — 08.01.2024
Date of judgement — 21.02.2024
Thubuai remtute
- Vanlalmawia — President
- Esther Lalmuanthangi — Member
- Zomuana — Member
Complainant Pu Malsawmkima Royte hian kum 2015 December ni 12-ah Zothan Motor Works, Thuampui Showroom atangin Tripper LPK 909/27 BS 3 chu a lei a. Document zawng zawng a ti fel vekin Zothan Motor Works kaltlangin Insurance pawh a tifel nghal vek a ni.
Vanduaithlak takin he motor thar hi November ni 21 2019-ah a accident hlauh mai a. Complainant hian a vanduaina tawh chungchangah hian Bajaj Allianz Company leh Zothan Motor Works hnenah a thlen a ni. A tawi zawngin han sawi ila. Opposite Party Bajaj Allianz leh Zothan motor works ten a beisei anga thil an lo umzui sak loh avangin Nizoram State Consumer Commission hnenah zualkovin complaint a thehlut ta a. Complainant Malsawmkima hian rilru tihnat man(mental agony and stress) Rs. 100000/- (nuai khat) pek a phut a. Commission chuan Rs. 50000/-(singnga) chu opposite party, Bajaj Allianz Company chu chawi tur leh he pawisa hi ni 60 chhunga tlak vek turin thutlukna(judgment) a lo siam ta a ni.
Insurance titu te hi CONSUMER an ni a, Insurance Company-te hi Service Provider an ni. Consumer-te chu tha takin service provider-te hian an lo dawng sawng thin tur a ni.CUSTOMERTE CHU LAL AN NI.