Inrinni zan khan FA Cup semi-final hmasa zawk khelh a ni a, champion lai Manchester City chuan harsa taka Chelsea hnehin fina an lut. City hian Manchester United leh Coventry City te inkhela chak zawk zawk an hmachhawn zui leh ang.
Wembley Stadium a team lian Manchester City leh Chelsea ten final luh an inchuh a, inkhel hmuhnawm lantirin an inhnehtawk hle. Chelsea tan FC Cup hi champion theihna awmchhun a nih tawh vangin Pochettino team in chak an tumruh hle. Champions League-a tla hlimhlawl an nih vangin City pawhin chak a, final luh ngei an tum ve bawk. Semi-final hi team hnih ten an ngai pawimawh hle a, an player tha ber ber an luhtir.
Season kal meka chetha tluang hlei thei lo Chelsea hian champion lai City lakah an khel tha viau a, goal thun theihna hun tha pawh an nei. Blues striker Nicolas Jackson chuan goal thun theihna hun tha tum thum ngawt a nei a, uiawm takin a hlah vek thung. City hian Real Madrid an hmachhawn tum ang thoin Chelsea lakah ball an chang tam fal a. Goal shot leh Corner pawh an nei ngah zawk. Chuti chung chuang goal thun an harsat chhunzawm a, Chelsea lakah hian goal an thun har hle. Hun rei tak chhung goal lut a awm theih loh hnuin Bernardo Silva chuan minute 84-naah goal pawimawh zet a thun a. Silva goal thun hmangin City hian Chelsea an hneh a, FA Cup final an lut zui ta a ni.
Chelsea laka chakna goal thuntu Silva hian Champions League quarter-final-ah Real Madrid an hmachhawn tumin penalty a hlah a, semi-final lut lovin an tlak phah. Real laka penalty a thelh vangin mualpho viau mah se FA Cup-a goal a thun hmangin final an lut ve thung a, a mualphona a khuh mawi. Tarlan tawh angin Manchester City hian Manchester United leh Coventry City te inkhela chak zawk zawk hmachhawn in, FA Cup-ah champion nawn leh ngei an tum ang.