- George L. Ralte, Vaivakawn
Mizo ten khawhar in/mitthi in a lengkhawm hla kan sak tam zing a mi leh hla lungkuai tak sak nuam em em, hla lar tak ni bawk chu HAN THLIR TEH U ROMEI ZAM KARAH tih hla a ni.He hla lo pian chhuah dan hi tun tum chu i han thai lang teh ang.
He hla lo pian chhuah chhan ber leh a changtu pa ber ni bawk chu Chhunthanga a ni.Leng khua a an awm laiin tleirawl naupang te niin nupui atan Lawngthluaii a nei a.Tleirawl inngaih zawn lai a innei an ni bawk a, an induh tawnin an inngai em em a ni. An in hmangaihna tizual turin Lawngthluaii chuan nau paiin, an inneih atanga thla kua ah Lawnthluaii chuan thla ruk mi nau pai chungin a thi a ni.
Chhunthanga chuan chutianga a nupuiin a thihsan chu tuar thiam har a ti em em a, a lung leng lutuk chu awm ngaihna a hre lo a ni ber mai.A nupuiin a thihsan a tawrh nasat em avangin khawhar in riak an tin vek tawh hnu ah pawh a thian Lalruala chuan a la riah pui thin a ni.Zan khat chu mumang mak tak mai a nei a, chu a mumang ah chuan Chhungthanga chuan a nupui chu Aizawl a Bazar mipui zi nuai nuai karah hmu nawlh hian a inhre tlat a, a zawng ta vak vak mai a, zawng hmu zo lova beidawng tak a Rahsi veng lama a kir lai chuan van lam a thlir chho ta a, chu tlang chu thleng thaw nuam em em leh mawi em em mai hi a han hmu ta a, chu tlang chung zawl pan theihna tur chuan lung kailawn nalh em em mai hi a han hmu bawk a ni.
Chhunthanga chuan chu lung kailawn awm zui mai chu a zawh chho ta a, a han thlen chhoh chuan tlang chung zawl, phul rai dup leh nawm hmel em em mai hi a han hmu ta a ni.Chumi hmunah chuan a nupui chu a awm ngei ringin a hawi kual vel ruai a, chutia a hawi kual vel lai chuan mihring a var vek a inthuam mi pariat vel hi hlim hmel leh nuam ti em em hmel hian Cinema a Slow Motion ang deuh hian an rawn pen rual a, hlim taka zaiin an zing a pakhat chu Chhungthanga chuan a nupui duh tak leh a ngaih em em mumang thleng pawha a lo zawn thin Lawngthluaii ngei mai chu a ni tih hriain a hmu ta a.
Gate pawn lam atang chuan a au vak vak a,Chhungthanga chuan hetah hian maw i lo awm reng, eng a ti nge min hrilh loh, ka zawng ka zawng che a, daileng pawhin ka kalsan ngam lo che a, ka nghak reng che a sin tiin a au ta vak mai a ni.Chutia a nupui a va au zawh chuan an ni ho chu an in her siau va, an ban te vaiin KAN LENG DIAL DIAL LUNGRUAL KIMIN, tih hla hi sa chungin an kalsan leh ta a ni.
Chutia an kal liam ta mai chu Chhunthanga chuan a tuar thiam lo hle mai a, a lung a lung lutuk chu a tlu tawp mai a, lung chhe vankaiin a tap ta hawm ham a, chutia a tap chu a thian pa amah riah puitu Lalruala chuan a lo hria a, Chhunthang tho rawh, i zahpui awm em mai.Eng nge i tah thlawrh thlawrh tiin a hau a. A harh chhuah hnu pawh chuan a nupui te hla sak chu a bengah a la cham reng a, tichuan khawvar velah ah an khua a hla phuah thiam Saihnuna leh zai thiam Liantawna te punin a thu leh a hla thluk an siam rem ta a ni.He hla phuahtu chungchangah hian sawi dan hrang hrang awm bawk mahse mimal phuah ni lovin Chhungthanga, Saihnuna, leh Liantawna te phuah a ni.