April 19, Zirtawp zan khan Indian Super League play-off khelh tan a ni a. Odisha FC leh FC Goa ten hnehna changin semi-final an lut. Odisha FC in Kerala Blasters FC an hneh tumin Mizo player Isak Vanlalruatfela-a’n chakna goal a thun.
Odisha FC hian play-off quarter-final-ah Kerala Blasters FC an hmachhawn a, Kalinga Stadium-a inkhel hmuhnawm takah Odisha in Mizo player Isak Vanlalruatfela goal thun hmangin hnehna hlu tak an chang. He inkhel hmuhnawm takah hian Kerala Blaster in bul an tan tha zawk a, minute 67-naa Fiodor Cernych goal thun hmangin hma an hruai.
Hnufual zawk an nih hnuin Odisha in an si phurh sut ngei tumin tan an khawh a, an khingpuite an nawr na hle. Hun tawp dawn hnaih minute 87-naah Diego Maurício chuan goal thunin an si phurh a sut. Hun pangngaiah chak zawk an awm theih loh hnuin Mizo player Isak Vanlalruatfela chuan minute 98-naah Odisha chakna goal pawimawh zet a thun a, he goal hmang hian 2-1 in hnehna an chang a, semi-final an lut zui ta a ni. Odisha FC hian ISL league champion Mohun Bagan Super Giant an hmachhawn zui leh dawn a. Thawhleh zan khiang semi-final hmasa zawk an khel ang.
Zirtawp zanah Odisha FC in semi-final an luh hnuin inrinni zan khan FC Goa chuan an khingpui Chennaiyin FC chu 2-1 in an hneh a, Mumbai City FC hmachhawn turin semi-final an lut ve bawk.
Pandit Jawaharlal Nehru Stadium-a inkhelah FC Goa hian minute 36-naa Noah Wail goal thun hmangin hma an hruai a. Brandon Fernandes chuan minute 45-naah an goal hnihna thunin an hmahruaina a tizau. Goal hnih an chhuah zawn hnuin Chennaiying tan Lazar Cirkovic chuan minute 45’+4-ah goal thunin an si phurh a sut then. Chawlhlawk hmain goal thum ngawt lut mah se chawlhlawk hnu lamah goal dang a luh belh thei tawh lova, FC Goa chuan Mumbai City FC hmachhawn turin semi-final an lut ta a ni.