Kan rama sava zirchianna kalpui mekah April 7, 2024 khan sava vang leh hlu tak mai, Vangá Blyth’s Tragopan Tragopan blythii chu Thaltlang khaw ram chhung, Phawngpui National Park nena in ri ah thla lak fuh a ni a; hei hi Mizoramah Vangá ala awm ngei a ni tih kum 10 hnu a chian leh theihna awmchhun a ni.
Vangá te hi International Union for Conservation of Nature (IUCN) leh BirdLife International te chuan mang mai hlauhawm hnai tawh ‘Vulnerable’ category ah an dah a ni. An chenna ram chereu zel vang te, an sa ei atana pèl thin an nih vang te hian an tlem tial tial niin hriat a ni bawk. Chuvangin mitin ten Vangá mai ni lovin kan rama nungchate leh an chenna hmun te humhalh a, vawnhim chungchangah nasa zawka tan la turin Conservation Mizoram chuan Mizoram mipui an ngen tak meuh a ni.