Inrinni zana English Premier League khelhah Arsenal chu mikhual an nihna Molineux Stadium-ah si hnih faiin hnehna an chang a, table chung berah an kir. Inrinni zana inkhel dangah table mawngphah Sheffield United chu an mikhual Burnley hneh lovin an tlawm a, an dinhmun a chhe zual zel.
Mikel Arteta enkawlna hnuaia hmasawn tak Arsenal hi tunhnaiah an chetha lo. An mikhual Aston Villa lakah an tlawm vangin EPL-a an hmahruaina an hloh a. Champions League-ah Bayern Munich an hneh loh vangin Semi-final an lut zo lo bawk. Result an neih chhiat zawn vangin rinhlelhna lian tak tawk chungin Molineux Stadium-ah Wolves an hmachhawn. Chak an mamawhna inkhelah beisei angin an khel tha tawk lova, an chak zawh loh leh mai a hlauhawm hman hle. An tana fiahna pawimawh takah Trossard leh Ødegaard te goal thun hmangin hnehna an chang a, point thum hlu tak an hmu.
Hlauthawng tak chunga inlan Arsenal hian khel tha viau lo mah se chawlhlawk dawn tep-ah goal khat an thun hman. Mamawh laia goal thun thei tan Leandro Trossard chuan Gabriel Jesus siamsak atangin a pet goal a, minute 45-naah hmahruaina goal a thun. Trossard goal thun hian Arsenal inrintawkna thar a pe a, nuam ti takin an inlan zui theih phah.
Chawlhlawk hnu lamah Arsenal an khel tha chhunzawm viau naa goal thun belh erawh an harsat. Goal dang a luh belh tawh dawn lo emaw tih hnu minute 90+5-ah captain Martin Ødegaard chuan Arsenal goal hnihna thunin, an chakna a nem nghet. Odegaard goal thun hnu hian goal dang a luh belh thei tawh lova, Arsenal chuan Mimuala an khingpui Wolves chu si hnih faiin an hneh a, point thum hlu tak an hmu.
Wolves laka hnehna an chan vangin Arsenal hian hmahruaitu Manchester City chu point khatin an lehpel a, table chung berah an kir. Arsenal elpui lian Manchester City hian inrinni zan khan FA Cup semi-final an khel a, Chelsea hnehin final an lut. Arsenal ai hian vawi khatin an khel tlem zawk a, pahnihnaah awm leh rih mah se champion nawn leh theihna hun tha tak an la nei thung.
Inrinni zana inkhel dangah table hnuai lama awm pahnih Sheffield United leh Burnley ten inkhel pawimawh tak an hmachhawn a, tabla mawngphaha awm mek Sheffield hi an chungchiaha awm Burnley lakah 4-11 ngawtin an tlawm a, championship lama tlak an hnaih deuh deuh zel.
Him hram an tumna kawnga chak mamawh em em Sheffield United hian mikhual Burnley lakah chawlhlawk hmain goal hnih an chhuah hman a, chawlhlawk hnu lamah goal khat thun bawk mah se goal hnih an chhuah belh leh tho thung. An chung chiaha awm Burnley lakah an tlawm vangin Sheffield dinhmun a chhe lehzual a, khelh 33 atanga point 16 chauh la hmu an nih vangin him turin thil mak an thlentir a ngai hial tawha ngaih a ni.
Sheffield United ang tho a tlahniam thei dinhmuna ding mek Luton Town pawh an mikhual Brentford lakah 5-1 ngawtin an tlawm a, dinhmun khirh zawkah a tlu lut ve bawk.