Pathianni zan khan Baecelona Open mipa final khelh a ni a, inkhel hmuhnawm takah Casper Ruud chuan Stefanos Tsitsipas a hneh a, 2024-ah a vawi khat nan a champion.
Inelna hnuhnung pahnihah final-a intum zawn Ruud leh Tsitsipas te hian Barcelona Open final-ah hmuhnawm takin bul an tan a, set khatnaah an inhnehtawk hle. Ruud hian set tir lamah break a nei nghal a, set la mai tura ngaih a nih laiin Tsitsipas-a’n beak a nei let ve leh. Game an inlak chhawk leh zak zak hnuin Ruud hian break a nei nawn leh a, he a break nawn lehna hmang hian game nga hloh chungin set la zui ta a ni.
Set khatna a lak hnuin Norwegian third seed Ruud hian set khatnaah bul a tan tha zui viau a, 4-1 ngawtin hma a hruai hmen. Greek tlangval Tsitsipas-a’n break neiin a khingpui nawr viau mah se game hnih bak a lak belh thei lova, inelna lianah champion zawn a tumna a puitlin zo lo. Ruud hian khingpui hautak Stefanos Tsitsipas lakah 7-5, 6-3 in hnehna a chang a, kum kal mekah a vawi khat nan a champion.
Grand Slam-ah vawi thum ngawt final khel tawh Casper Ruud leh Grand Slam-a champion harsat ve bawk Stefanos Tsitsipas te hi chawlh kar khat liam ta maiah khan Monte Carlo Open final-ah an lo inhmachhawn tawh a, hemi tum hian Tsitsipas a chak zawk a. Monte Carlo Open-a a hneh loh Tsitsipas lakah phuba la in, Barcelona Open-ah a champion ve ta thung a ni.
Barcelona Open-ah Casper Ruud a champion lai hian Munich khawpuia khelh BMW Open-ah tualchhung tlangval Jan-Lennard Struff chuan a khingpui American Taylor Fritz chu set hloh lovin a hneh a, ATP tour-ah a vawi khat nan a champion ve bawk.