Pathianni zan khan FA Cup semi-final hnuhnung zawk khelh a ni a, Wembley Stadium-a inkhel hmuhnawm tak; goal tuk ngawt luhna inkhelah Manchester United chuan Conventy City lakah vanneihna an chang a, final an lut. United hian final-ah Manchester City an hmachhawn ang.
Manchester United khingpui Conventry City hi semi-final lut pali zingah EPL club ni lo awmchhun an ni a, club pali zingah ranking-a hniam ber an ni. Championship club hmachhawn tur an nih vangin United hi awlsam taka chak thei tura ngaih an ni. Coventry City laka bul tan tha viau mah se tla zawkah an tang teuh hle a, offside vangin tlak an pumpelh thei hram chauh.
Coventry City lakah rin lawk ang ngeiin United in bul an tan tha a, darkar khat tlin hmain goal thun an thun hman der. Minute 23-naah Scott McTominay chuan Dalot siamsak atangin hmahruaina goal a thun. Team lian zawk United in goal an thun hmasak vangin championship club tan chet a harsa a, chawlhlawk hmain goal an chhuah belh leh. Chawlhlawk dawn hnaih minute 45+1-ah defender Harry Maguire chuan fuh zetin a tauh lut a, United goal hnihna a thun a. Red Devils hian si hnih faia hmahruai chungin chawlhlawk an hmang.
Chawlhlawk hnu lamah United an khel tha chhunzawm a, goal an thun leh thuai. Minute 58-na lekah Captain Bruno Fernandes chuan angle chep tak kar atangin a pet goal a, an goal thumna a thun. Darkar khat pawh tling loah United in si thum fai ngawta hma an hruai hman vangin final lut tur zawk a chiang tawk viau a ngaih a ni a. Erik ten Hag-a team te hian goal dang an thun belh nual a rinawm viau bawk a, City hmachhawn tur chu United an ni a nih ngam tawh.
An mahni tantute beidawng viau tawh mah se team lian lehthal thiam Coventry City player te an beidawng ve lova, huaisen leh thatho takin an inlan chhunzawm. Huaisen taka an inlan rah an seng a, goal an thun ta nge nge. Ellis Simms chuan minute 71-naah goal thunin an si phurh a sut then. Goal an thun nawlh vangin Sky Blues an phur thar leh zual a, goal an thun belh leh thuai bawk. Hmahruaina goal an thun atanga minute riat hnu lekah Callum O’Hare chuan an goal hnihna a thun zui leh zat. Goal hnih an thun zawn vangin phur namen lohin an phur a, an khingpui United hi an zuam zek zek tawh.
Phur taka inlan in, United nawr buai viau mah se Sky Blue hian goal an thun belh thei lawk lova, an tlawm nge nge dawn niin a lang hman. Goal thun belh thei lawk lo mah se, hun pek belh tawp dawn tepah an vannei a, penalty an hmu. Aaron Wan-Bissaka handball vanga penalty an hmuh hi Haji Wright chuan inringtawk tak chungin minute 90+5-ah a pet goal a, an si phurh a sut zo. United lakah si thum fai ngawta hnufual tawh Coventry City in an si phurh an sut zo thei mai hi thil mak a ni a, thil ropui a tling bawk.
Hun pangngaiah chak zawk an awm theih loh vangin extratime khelh chhunzawm a ni a, mak tak maiin extratime-ah pawh Coventry City chu hlauhawm zawk an ni a, an chak teuh viau bawk. An hun tha neih an chhawr tangkai zawh loh hnuin hun tawp dawn tep-ah Sky Blues hian goal an thun ta nge nge. Hun tawp dawn tepa goan an thun hmangin team ropui an hneh a, FA Cup final an lut ang hiala ngaih a ni hman laiin offside a awm leh awm VAR hmangin en a ni a, offside a lo awm zeuh vangin he goal hi hnawl a ni a, United in tlak an pumpelh hlauh.
Extratime-ah pawh chak zawk an awm theih loh fo vangin penalty shoot-out hmangin chak zawn zawn chhunzawm a ni a, United in bul an tan tha lo. United tana pet hmasa ber Casemiro chuan a thelh nghal pang. Dinhmun chhe zawkah ding hmasa mah se boruak sang takah tawn hriat ngah zawk a nihna United in an hlawkpui zui thung. United tana pettu Diogo Dalot, Christian Eriksen, Bruno Fernandes leh
Rasmus Højlun ten pet goal vek laiin Coventry City tana hnuhnung pahnih; Callum O’Hare leh Ben Sheaf ten an thelh zawn thung a. United hian 4-2 in hnehna an chang a, vanneithlak takin final an lut ta a ni.
FA Cup final hi May ni 25, Inrinni zanah khelh a ni dawn a. Manchester khaw club pahnih; Manchester City leh Manchester United ten Wembley Stadium-ah champion nih a inchuh ang.