Nimin khan ZPM chuan Party Office-ah chhung inkhawm hun an hmang a, thusawitu K.Sapdanga, Minister chuan, “Ruling party berin sum kan chelek miau loh avangin MP inthlanpuiah sum leh therhlo sem thawm hriat a ni lova, inthlanna danglam leh chhinchhiah tlak kan tawng a, chuvangin Pathian leh mipuite hnenah ZPM party chuan lawmthu kan sawi a ni,” a ti.
Home Minister K.Sapdanga chuan, “MP inthlanpuiah khan party dang zawng zawngin aiin kan phur a, kan chechhuak nasa bawk. Hetiang tak maia sawrkar lai MP inthlana phur leh chechhuak nasa hi an awm ka la hre ngai lova, neutral te khawngaih khawpin kan thawkrim a, Pathian pawhin mal min sawm ngei ang tih ka ring. MP inthlanah khan ruling party berin sum kan chelek miau lova, party dang tan chuan chelek ngaihna a awm lo. Kalphung tharah inthlanna danglam leh chhinchhiah tlak tak kan tawng niin ka hria a, chuvangin Pathian leh mipuite hnenah ZPM party chuan lawmthu kan sawi a ni. Budget session kan neih zawh takah khan Budget Speech-ah eptu party te hlei hlei an lawm emaw tih tur a ni a, min beisei a sang a, an tih theih loh ti thei tur leh an tihsual pawh titha vek turin min beisei a, chu mai ni lovin leiba rulh tur thlengin kan chungah beiseina sangtak an nei a, a lawmawm tak zet a, hetiang hi Mizorama thil la thleng ngai lo a ni. Kan Chief Minister berin thawhrimnain bul a tan a, inrenchem kawngah nasa taka hma lain sawrkar hnathawkte hlei hlei an phur a, a thiam hlei hlei an lo ni. Tunah chuan sawrkar office han thlir ila thupek an zawm tha em em a, ZPM sawrkar-ah hian thawkrim mahse an lungawiin an ngaih a tha em em a ni,” a ti a.
“Health Care bill ba, Police TA/DA pungkhawm fe tawhte leh Eng chhit man ba, vaibelchhe tam tak tlingkhawm tawh chu thla 4 chhunga kan petla thei mai hi a mak a, kan Chief Minister thawhrimna Pathianin mal a sawm a ni. Mak tak maiin sawrkar laipui atanga Disaster Management lama sum hman tur April thla tira rial leh thlipuiin min nuai hma khan kan dawng vek hman a, chhiat tawkte puihna tur kan pechhuak nghal thei a ni. Kumin April 1 atangin ZPM budget a intan ve chiah a, hma tak tak kan la chho tan ve dawn ta. Chutihlaiin NABARD leh SASCI sum, an duh dan dana an lo chandarh tawhte siamthat a ngai nasa a, kan hmuh phak rengin awm mahse dan dik tak anga hmalak dawn chuan khawih chet ngaihna a awm lo. Mizoramah aikal mi 3365 zet an lo awm a, Sawrkar mi ni si lo, sawrkar thu leh hla hre tur leh thawk tura rawih an ni a, thil tisual pawh nise sawrkar mi an nih miau loh avangin hrem ngaihna pawh awm lo. An duh hun hunah confidential work an bih thei a, a pawi tak zet. Mahni thawhna tur hmun ni lova thawk an tam em em bawk a, heng mite hi Model Code of Conduct a zawh hunah chinfel an ni ang. A chhe lai siam that hna thawh tur a tam a, kan thawk thuai dawn. ZPM sawrkarah chuan a thar tam tam an vannei dawn a, rim taka thawktu chu ZPM an ni emaw ni lo emaw, a hlawkna teltu an ni zel dawn. Contract tesep beiseia vak vak lovin ram lam hawi ila, thawhrimna nen ZPM-in thlai thar leina tur sum a dah hi a chang hmasatu kan nih a ngai a ni,” tiin party mite fuihna thu a sawi bawk.
Richard Vanlalhmangaiha pawhin thu sawiin Lok Sabha MP inthlanah khan tlak huamin ka ding a, candidate zinga lar lo ber kha tute emaw avangin candidate lar ber ka ni ta hial awm e. A hun takah Pathian a che niah ka ngai a, ka lawm takzet a ni. Inthlan hma khan Grape chingtute chungchangah 35% a lar hle a, he thil hi ka sawichhuak ve lem lova, a chhan chu mimal intih hmingchhiat ka duh loh vang a ni. Sawrkar laipui khuan Market Intervention Scheme neiin sum hloh rulh dan tur chungchangah State sawrkar tum ve tur 25% leh Central sawrkar tum ve tur 75% a awm a. Congress sawrkar lai khan Chief Minister ngeiin lehkha min ziahsak mahse state sum thawh ve tur 25% chu sum neih loh chhuanlamin min pe thei ta lova, a hnua MNF sawrkar-ah pawh matching share kan dil a, chu pawh min pe thei lo. A tih theih dan tur nasa taka ngaihtuahin sum leh pai kan seng nasa a, 35% an sawiah khan chung senso zawng zawng chu kan khung khawm a, mahse nasa taka min beih nan an hmang ta hlauh a ni. Chuti chunga kut hnathawktute hmangaih ber ni awm taka an insawi thin hi a mak takzet a. Mimal intihhmingchhiat leh inbeih vak vak hi ka tihdan leh duhdan a ni ngai lova, mahse tih ngaihna a awm tak lovah chuan Criminal Complaint pawh hreh tak chungin ka thehlut ta a ni,” a ti ve bawk.
ZPM party chhung inkhawm hi Saithuama Mangpa, General Secretary chuan a kaihruai a, Col.Lalramhluna, Consultant chuan hunserh hmangin R.Lalhmunsiama, MP Election Campaign Committee Asst.Secretary chuan, “MP inthlan kan neih hma khan ZPM-ah mithar 43,100 kan nei hman a, star campaigner 40 awmin candidate team mi 7 nen campaign-a fehchhuak zawng zawng mi 224 an ni. Kan Candidate Richard Vanlalhmangaiha’n kar hnih chhungin khaw 174 a tlawh hman a, campaign-a fehchhuakten khaw 475 zet an tlawhchhuak hman a ni. Thahnemngai taka fehchhuak zawng zawngte chungah te, MPF, ECI leh inthlan buaipuitu zawng zawng chungah Campaign Committee-in lawmthu kan sawi a ni,” a ti bawk.